تابع أهالي شهداء بورسعيد مسلسل "الاختيار" بشغف، وكان هناك رد فعل على كل حلقة يشاهدونها، وكأنهم يقولون للجميع هؤلاء هم أبنائنا الذين استشهدوا وضحوا بأرواحهم فداءً لهذا الوطن، وكل "حكاية" شهيد لسان حال كل أم شهيد، تنطق لتقول "إنه ابني"، فعند استشهاد النقيب هيثم فتحي الذي جسد شخصيته الفنان محمد إمام و كانت كلماته الأخيرة قبل الاستشهاد، "غربل الكمين يا منسي أنا معايا عسكري شهيد وكلنا في الطريق، أنا لو مت قول لأمي ابنك مات راجل".
لم تمر ساعة إلا وكانت أمل عبدالله رضوان"48"عاما والدة الشهيد عمرو السقا، ضابط مهندس الذي استشهد عام 2017 في بئر العبد وكان عمره 24 عامًا تنشر صورته على صفحتها الشخصية "الفيسبوك"، و ترد على المشهد و تقول "راجل و سيد الرجالة و خير أجناد الأرض وزينة الشباب وعريس الجنة و فرحة عمري، بس أنا قلبي وجعني عليك يا حبيبي.
والدة الشهيد عمرو السقا ترد على مسلسل الاختيار "طبعا يا حبيبىي راجل
و سيد الرجالة"
والدة الشهيد عمرو السقا: الاختيار "وجع ما بعده وجع"
و في حوارها مع "أهل مصر" عقبت على المسلسل بأنه عظيم جدًا ويوضح للناس والشباب جيشنا بيعمل إيه، علشان يحميهم وبيموت إزاي علشانهم وفعلا جاء في وقت مضبوط علشان يرجع انتماء الشباب لجيشهم ولبلدهم لكن شعوري إيه وأنا بشوفه، "والله وجع ما بعده وجع"، كل واحد بيستشهد بشوف فيه ابني والرصاصة بتيجي في قلبي دموعي نزلة طول المسلسل، ابني كان بيشوف الأهوال دي ياحبببي يابني وطول المسلسل قلبي واجعني علي أولادي، "الشهيد" واللي في الكلية "الحربية" لكن بستغفر ربنا وبدعو للشهيد الله يرحمه، وبدعو لابننا اللي في الكلية ربنا يحميه ويحرصه وفي الأخر بفتخر بجيشنا وبفتخر بأولادي أنهم من خير أجناد الأرض.
والدة الشهيد محمد صبري: الاختيار مشاعر ممزوجة بالفخر والألم
تقول سحر الحبشي "49" عامًا، والدة الشهيد محمد صبري عبدالعال الذي استشهد يوم 13/12/2015 في سيناء في كمين بركان 9 في ارتكاز الخروبة، حيث إنه بعد انتهاء خدمته العسكرية تم رصده بقناصة، أصابته في قلبه فمات في الحال، بأن مسلسل الاختيار رائع وهادف فيه "وجع" لكن مهم جدًا لأبنائنا الشباب حتى يعرفوا قصص وبطولات من ضحوا من أجل الوطن ومن أجلهم، فعندما أشاهد المسلسل ينتابني مشاعر ممزوجة بالفخر والألم.
والدة الشهيد مصطفى خضر: الاختيار واقع وحكايات لأبطال كثيرة ستخرج للناس
تعقب سلوى محمد علي، والدة الشهيد مصطفى خضر و الملقبة بـ "سفيرة الشهداء"، أنا مش قادرة أقول عليه مسلسل لأن دي حياة كل أسر الشهداء، ده الواقع اللي أحنا عايشينه، لو الناس اتأثرت وبكت حزنت، أحنا في البكاء والحزن ده من يوم أولادنا ما ماتوا، كل شهيد جديد بيقلب وجع قلوبنا لكن هو عمل أكتر من جميل، لأنه بيكشف حقيقة الخونة وأعوانهم، تحية للقوات المسلحة لأنها سمحت بخروج عمل زي ده للنور، وعقبال البقية وإن شاء الله فيه قصص أبطال كتير هتخرج للناس، حتى يعلموا أن الوطن ثمنه غالي ودفعه الشهداء وأسرهم.
و تضيف والدة الشهيد أن التضحيات ستستمر في حب الوطن، أولادي خير جنود الأرض، سيظل الاختيار مسلسل يتكرر حتى نقضي على الإرهاب المسلم والمسيحي، وأرجوا أن تدعوا للشهداء بالرحمة ولأهلهم بالصبر.
وكل مشهد في مسلسل الاختيار بيحرق قلبي و شايفة المنسي البطل، وهو شايل ابني الشهيد، وبيصرخ و يقول يا نجيب حقهم يا نموت زيهم
مسلسل الاختيار نوبة صحيان للشعب المصري
ومن أجمل اللقطات التي كانت موجودة على صفحات السوشيال ميديا، وكانت معبرة بصورة كبيرة عن مجموعة كبيرة للشعب المصري، بل ربما يكون الشعب بأكمله، رسالة من سيدة مسنة تخاطب فيها رئيس الجمهورية الرئيس عبد الفتاح السيسي وتقول:
رسالة حقيقية من سيدة مصرية لرئيس الجمهورية تقول فيها هو أنا ممكن أوجه رسالة عتاب؟
من سيدة مصرية تشبه ملايين السيدات، الحقيقة مش قادرة أكتم في نفسي، بعد ما شوفت الحلقة الخامسة من مسلسل الاختيار عايزة أوجه عتابي للقائد الأعلى للقوات المسلحة، الرئيس عبد الفتاح السيسي، وعتابي لوزير الدفاع وكمان عتابي لوزير الداخليه ليه؟
ليه سيبتونا السنين دي كلها ملهيين في دنيتنا وحياتنا وشغلنا وأولادنا وأحفادنا، ليه شايليين الهم ده كله لوحدكم من غير ما تشاركونا معاكم فيه؟
منسي استشهد من 2017 وقبله كان فيه ١٠٠ منسي، وبعده كان فيه ١٠٠ منسي.
سيدة مسنة بعد مشاهد مسلسل الاختيار "عايزين نشيل سلاح ونطلع على سينا "
ليه سيبتونا على عمانا ليه ما كنش فيه حكايات زي "الاختيار" تتصور وتتقالنا؟ طب دلوقتي أحنا "موجوعين"
نعمل إيه يعني ؟؟ حاسين بالعجز والحيرة .. وعايزين نشيل سلاح ونطلع على سينا، والله العظيم ده إحساسي أنا دلوقتي ( وأنا ست كبيرة )
ليه يا جماعة الخير ما شاركتوناش معاكم السنين اللي فاتت دي كلها!
ليه سيبتم عيال ضايعة وتايهة من غير ما تعيشوهم الحقيقة؟
وتعرفوهم إن قعدتهم على النت تمنها كان غالي قوي، وكان لازم تعيشونا معاكم الواقع على أرض المعركة، اللي أشرس ألف مرة من كل حروبنا اللي فاتت والنهاردة وأحنا بنشوف معركة كمين الكتيبة 103، حبسنا أنفاسنا وعرفنا أحنا أد ايه صغيرين وقليلين مسلسل "الاختيار" نوبة صحيان وفوقان للشعب المصري كله جت متأخرة لكن أن تأتي متأخرا خير من أن لا تأتي أبدًا.
أرجوكم يا من عاتبتكم عيشونا معاكم يوم بيوم وشاركونا وخلونا نشيل وياكم، ولو جزء صغير من اللي إنتم شايلينه "القلب على القلب رحمة"، والله ثم الوطن من وراء القصد.
تابعوا آخر أهل مصر على Google News
