أثار حمو شاكر نجل ماما سناء، غضب عدد كبير من جماهير السوشيال ميديا، موجهين له تهمة الإهمال في والدته، بعدما عرف أن والدته تعاني من تعب شديد أصر على خروجها من المنزل للتنزه دون وعي منه، والذهاب بها إلى الشاطئ والتجمعات العائلية، كما خالف حظر التجوال وذهب بها إلى البحر، ونشر فيديوهات لها على حسابه كي يحقق على نسبة مشاهدات وأرباح عالية.
الجمهور يعلن غضبه من نجل ماما سناء
دون عدد كبير من الجمهور ذلك القضية، على حساباتهم الشخصية بموقع فيس بوك قائلين:" هحكلكم قصة ماما_سناء وابنها حمو_شاكر اللي قتلها بتصرفه الغلط وتعاطف الناس معاه، رغم أنه بعدها تاجر بموتها وناس كتير زعلت مني لما قولت كدا، بل وفيه ناس دعت عليا أنها هتترد فيا.
وتابع: "أسف لكن البوست هيكون طويل شوية وفيه شوية صور شارحة، وكل صورة هيكون فيها توصيف للي عاوز أقوله، محافظ البحيرة الحالي اللواء هشام آمنة أحال مدير مستشفى وطبيبين في كفر الدوار إلى النيابة العامة؛ بسبب بلاغ إهمال من مواطن «حمو شاكر» في وفاة أمه «سناء».
وأشار: "الغريب في الموضوع دا إن إجراء النيابة جاء قبل وجود تحقيق داخلي من قبل الشؤون القانونية للمستشفى، واللي اشتغل في مؤسسات هيعرف إن دا الإجراء الطبيعي إنه يكون فيه تحقيق داخلي وبعدها بتكون خطوة النيابة".
وأضاف: "مش هننكر إن فيه دكاترة كتير مستهترة وسيئين جدا وبيرفضوا يتعاملوا مع حالات مصابة بـ كورونا، لكن بردو فيه دكاترة كويسين جدا ضحوا بنفسهم عشان يعالجوا غيرهم في الوقت اللي كانوا بيتصابوا، ومافيش مكان ليهم في المستشفى ومافيش سراير عناية ليهم تنقذهم".
واستطرد: "المشكلة هنا مش عند الأطباء والممرضين، بل عند الدولة والحكومة اللي مقصرة في الشعب كله، وبتداري على فشلها في إنها بتعاقب الأطباء عشان ماحدش يقول عنها مقصرة".
وسرد أحد الرواد: "الدولة الفترة اللي فاتت أخدت قروض عشان مشروعات قومية زي الكباري والطرق والعاصمة الجديدة ومصانع جديدة، رغم إن المفروض في أزمة زي كورونا ينتهي العمل في كل شيء وكل أموال الدولة تصب في خدمة المستشفيات والقطاع الطبي، لكن الدولة صرفت فلوسنا على دول تانية وأرسلت مساعدات رغم إن عندنا قصور".
وحكى باقي القصة:" الناس زيها زي الحكومة بتحاول تنفي المسؤولية عن حمو ابنها واتعاطفوا معاه لإنهم زيه بيعملوا الغلط، وبتلبس التهمة في الأطباء، رغم إن حمو كان سبب من أساس مرض أمه سواء بالفيروس أو بالالتهاب الرئوي؛ لإنه مالتزمش بالحظر والتعليمات الحكومية".
واختتم حديثه: "طبعا ناس كتير بتستشهد بكلام حمو إن أمه ماكنش عندها كورونا وكان عندها التهاب رئوي، وردي عليهم هيكون في الفقرة اللي جاية، كنت بتكلم مع دكتور من فترة وقالي إن معظم الحالات اللي بتموت قدام المستشفيات كانت بسبب الالتهاب الرئوي رغم أن قبل إصابتهم ماكنش عندهم أي بوادر، ودا فيه احتمالية أولى إن الفيروس يكون اتحور في مصر وبقى بيعمل أعراض الالتهاب الرئوي، وعشان كدا الأجهزة مش بتتعرف عليه وبعدها المريض بيموت، والاحتمالية الثانية وهي إن المستشفيات بتشخص بشكل متعمد حالات الوفاة على أنها التهاب رئوي عشان الأرقام ما تظهرش إن فيه كارثة عشان السياحة، وعشان الحياة تعود لطبيعتها والاقتصاد يشتغل ومش مهم الناس تموت".
وأكد بالصور ما قاله عن نجل ماما سناء: "مرفق صور لمستندات بتكشف إن حمو وأخواته إيجابي كورونا، ودا بيدل إن ماما سناء هي كمان كانت مصابة لكن هو كدب على الناس عشان يعمل فيديوهات وعشان الناس تروح العزاء، المصيبة إن حمو طلب أنه يخرج من مستشفى العزل ويعزل نفسه في البيت ويا عالم هيخرج ويتعامل مع الناس ولا لا، هنشر مجموعة صور وتحتها عبارات شارحة بتكشف إن حمو كان بيخرج أمه وبيعملوا عزومات خارج البيت وماكنش ملتزم بالتباعد الاجتماعي، لا وكمان كان بيوديها جيم وبيصور هناك، ودا بالمخالفة لقانون حظر التجوال، يعني المفروض هو وأمه وصاحب الجيم يتقبض عليهم ويتسجنوا ويتغرموا والجيم يتشمع.
يوم 28 مايو كانو عاملين عزومة بصل، وفسيخ، يوم 5 يونيو حمو أخد ماما سناء ونزلها الشارع، يوم 8 يونيو نزلها تاني هو، وأخوه، يوم 12 يونيو صورها فى الجيم، يوم 14 يونيو عملوا عزومة عندهم، يوم 20 يونيو عمل فيديو بعد ما ماتت، يعني ماعملش ولا فيديو وهي تعبانة، كمان هنشر مجموعة صور وتحتها عبارات شارحة بتكشف إن حمو تاجر بموت أمه وكان هدفه يزود عدد المشاهدات عشان يدخله فلوس كتير، وهكشفلكم إن حمو كان ممكن يدخل أمه مستشفى خاصة لكن هو استخسر فيها الفلوس اللي بيكسبها من اليوتيوب، ولما ماتت قال يكمل متاجرة، للأسف الشديد أحنا شعب عاطفي وبيحب لحظة الصعبانيات، ومش بيتعلم من القصص الكتير اللي فيها فبركة، وإن ناس ممكن تبيع نفسها وشرفها وعرضها عشان تحقق مشاهدات ويدخلهم فلوس زي أحمد حسن وزينة ومودة الأدهم وبنات وشباب كتير، هسيبكم بقى مع الصور عشان تستمتعوا بالقرف اللي انتم فيه وبتعاطفكم وبابنها اللطيف".
كما طالب أحد الرواد بالتحقيق معه، في تلك القضية حيث كتب عبر حسابه الشخصي بموقع فيس بوك: "أنا عامة مابحبش أهيص في الهيصة واطلع اهبد في موضوع الساعة بس للضرورة أحكام، بخصوص موضوع ماما سناء الله يرحمها برحمته ويدخلها فسيح جناته يارب بس في كلمتين محشورين في زوري ولازم أقولهم، لو ركزتوا وكملتوا فيديو العياط والشحتفة اللي عمله ابنها حمو ومراته وأخوه للآخر هتلاقوا مرات الابن غلطت، وقالت إن حماتها ماطلعش عندها كورونا".
وتابع :"كان عندها التهاب رئوي شديد عشان كده هما كلهم كمخالطين ماعندهمش أعراض كورونا ولا مرض، لإن الست ماكانش عندها كورونا أصلاً وحللوا واتأكدوا بالفعل من كده، الست كان بقالها مدة طويلة تعبانة وبتكح جامد والبيه قال كده بنفسه، وقال إنه راح زي أي حد جبلها إزازة دوا كحة من الصيدلية وشكراً على كده .. لا وداها لدكتور ولا عالجها صح عشان ماكانش فاضي مع أنه مقتدر مادياً ويقدر يعالجها في أحسن مستشفى خاصة".
وأضاف:"حمو بيه كان بيلف بيها من الجيم للمولات للعزومات لهنا لهناك، ويصور ويكسب من وراها فماكانش ينفع يتعطل ولو يوم واحد بسبب مرضها، ولما دورت ورا الموضوع لقيت جيرانها مأكدين الكلام ده فعلاً، البيه رايح بيها المستشفى خلصانة أصلاً وبتطلع في الروح، أهمل في علاجها عامداً متعمداً لإنه كان بيستغلها وبيتكسب من وراها، استغلها حية وميته ولغاية دلوقتي بيستغلها، الفيديو اللي عمله بعد موتها وطلع يمثل ويتشحتف ويعيط فيه ويشتم في الأطباء والمستشفيات".
واستطرد "الحكومة والبلد كلها كسب من وراه ٢٥٠٠ دولار بعد ماعمل ٢ مليون مشاهدة، ده غير أنه تم استغلاله أسوء استغلال داخل وخارج مصر، وتم التعامل بغباء مع الموضوع من قبل المحافظ والوزارة والأطراف المعنية، أحنا المفروض نحوله للتحقيق ويترفع عليه قضية رأي عام ونلبسه في الحيطة، ونخليه عبرة لكل الكلاب اللي بيطلعو يعملوا زيه عن قصد أو غير قصد، ويجيبولنا الكلام ووجع الرأس من القنوات الحقيرة اللي بتستغل الفيديوهات دي ضدنا .. حسبي الله ونعم الوكيل .. الله يرحمك يا حاجة ماعرفتيش تربي".
آخر فيديو ظهرت بها ماما سناء
ننشر أخر فيديو ظهرت خلاله ماما سناء وحمو شاكر عبر قناتهما على اليوتيوب، وكان عنوانه "حطت لـ حماتها سم في الدواء (الدين المعامله) وأول ظهور لوجه جديد".
كانت فكرة فيديو ماما سناء وحمو شاكر أن يُظهر أن بالمعاملة الجيدة ستجد معاملة مثلها، فظهرت زوجة حمو شاكر وهي تعامل ماما سناء بطريقة غير لائقة لتقوم اليوتيوبر ماما سناء بالشكوى لابنتها وابنتها تحدثت مع حمو الذي وبخ زوجته.
وقبل وفاة ماما سناء بأيام، ظهرت في الفيديو نفسه زوجة حمو شاكر وهي تطلب من شقيقها سم كي تتخلص من حماتها، فاشترط عليها أخيها بأن تعامل حماتها بطريقة جيدة لمدة أسبوع فترة مفعول السم في الجسم كي لا يشك بها أحد.
وخلال فيديو ماما سناء وحمو شاكر، وجدنا زوجته تعامل ماما سناء بشكل جيد لتجد أن رد الفعل كان ضعف هذا بمعاملة جيدة أكثر من حماتها لتندم زوجة الأبن، وتطلب من أخيها دواء يُبطل مفعول السم.
أخبرها شقيقها أنها لن تتسبب في وفاة ماما سناء حيث إنه أعطاها فيتامين وليس سم كي ترى رد الفعل على المعاملة الجيدة، مشيرًا إلى أن الرسالة من فيديو ماما سناء وحمو شاكر هو أن "الدين معاملة".
وفاة ماما سناء
وفاة ماما سناء خبر أشعل مواقع التواصل الاجتماعي، فتوفيت سناء عبدالحميد الشهيرة الملقبة بـ ماما سناء وهي من أشهر اليوتيوبر، بعد صراع مع المرض.
تابعوا آخر أهل مصر على Google News
