"عايزكم جنبي في الفرح"، هذه الجملة كفيلة بأن يتحول اصحاب العريس لوحوش متحمسين لتحرير الاراضي المحتلة، حتى يثبت كل منهم أنه "قد المسئولية"، وفي السطور التالية نستعرض ما يفعله الوحوش للوقوف بجانب الصديق يوم زفافه في عيد الحب.
1-الجندي المجهول
الصاحب الحقيقي من أهم الناس اللي بتساعد في نجاح الفرح ولابد من المحافظة على الهدوء طوال اليوم لأن العريس غالبا متوتر جدا.
2-اختيار القاعة
ممكن يحتاجك معاه في اختيار القاعة قبل ما يروح مع العروسة وممكن يخليك تعمله قائمة اغاني تشتغل وتتأكد منه عايز مهرجانات ولا لأ.
3- قائمة المعازيم
لابد وأن تراجع مع صديقك قائمة المعازيم وتتأكد انه كلم الناس ممن يرغب في وجودهم فعلا، حتى لا يغضب أي منهم وبالتالي يشعر هو بالحزن في حال النسيان.
4- العربيات
تشوف مين هاييجي بعربيته من أول اليوم يساعدكم أو يوصل العروسة الكوافير ومين هاييجي قبل الفرح بوقت مناسب عشان يطلع الزفة معاكم ورتب الركب.
5-جمع الهدايا والنقطة
كلم الأصدقاء الأنتيم اللي تعرفهم وكلف حد تاني من الشلة يكلم الصحاب اللي انت ماتعرفهمش عشان تجمع الهدايا أو النقطة وتديهاله بدري قدر الإمكان عشان لو هو محتاج الحاجات أو المبالغ دي تبقى عنده ودي هتبقي افضل خدمة.
6-البدلة
اختار معاه البدلة اللي تناسبه وتناسب جسمه وتخليه مايتهورش ويشتري بدلة أوفر بتلمع قوي أو موضة قديمة وعند اختيار المناسب إمنحه ثقة، ودا أمر هيتطلب منكم لف كتير على المحلات، مع التأكيد على الميزانية.
7-الملابس الداخلية
ممكن يحتاجك كمان تنزل تشتري الملابس الداخلية معاه، ووقتها اعرف انك من اقرب الناس واغلاها عنده، فساعد في اختيار حاجات تناسب ذوقه وزود عليهم حاجة تكون مطرقعة.
8-شهر العسل
لو هيسافر مع العروسة أكد الحجز، سواء الطيارة اوالفندق، ولا مانع من مساعدته في اختيار المكان المناسب وتكلم الفنادق تشوف أحسن عروض وطريقة الحجز اون لاين.
9 -اكسسوارات العريس
قطع صغيرة ومهمة جدا هي الاكسسوارات الخاصة بالعريس مثل الساعة والقميص والحزام والحذاء والبابيون أو الاسكارف أو ربطة العنق ومنديل البدلة.
10- حفل وداع العزوبية
لو عملتوا قبل الفرح بيوم حفلة لوداع العزوبية تروح معاه وتخليه يروح بدري وما ياخدش او يشرب كثير من اي شئ، وتبعد عنه الناس اللي عايزة تمسي عليه ومايسهرش عشان مايبقاش شكله مجهد.
11- بوكيه الورد
تابع مين هايجيب بوكيه الورد ومين هايودي البانر ودفتر المدعوين للقاعة وممكن تروح انت تجيبهم وتشوف مين هايزين العربية وخلي فيها قميص أبيض احتياطي لزوم الطوارئ.
12- الكوافير والحلاق
يوم الفرح الصبح تتأكد منه ان العروسة راحت الكوافير في المعاد أو محتاجة حد يوديها، وأكد على ميعاد الحلاق.
13-برفان وملمع
تروحله يوم الفرح بدري ومعاك شنطة صغيرة فيها برفان ومزيل عرق وملمع أحذية ومناديل وشاحن وباور بنك وبنادول وتخليها قريبة منك في القاعة لأن انتوا الاتنين هتحتاجوها.
14-القاعة الفاضية
أول ما توصلوا تعرف لو القاعة اتملت ولا فاضية ولو فاضية تخليه يستنى في الغرفة الملحقة بالقاعة لغاية العدد ما يبقى مناسب وتأكد على الدي جي الأغاني اللي اتقفتوا عليها.
15- قدام عينه
خليك دايما قدام عينيه طول الفرح عشان ممكن يحتاجك تظبطله البابيون او القميص او محتاج حد أو أي حاجة غالبا هيحتاجك كثير.
16-المناديل
خلي معاك ومعاه مناديل كتير وتديله منها بعد ما يكتب الكتاب عشان يمسح صوابعه وادي العروسة كمان واديله مناديل طول ما هو بيرقص عشان هتلاقيه بينقط عرق من الرقص.
17-البوفيه
أول البوفيه ما يفتح اتأكد ان كل الناس نزلها الأكل والمشروبات والتحلية وتتأكد من عدد الأطباق اللي نزلت وتشوف لو هتحتاج زيادة ونظم الأمور.
18-هدايا الفرح
لو في هدايا الناس جابتهاله في الفرح تتأكد انها اتحطت في العربية او عربية حد هايبقى معاه لغاية البيت وتبلغه بيها في نهاية الفرح.
19-تورتة العروسة
في نهاية الفرح تراجع التورتات اللي هاياخدها وتبلغه بعددها وتشوف هاتروح في عربيات مين واتأكد إنها وصلتهم.
20-سيارة العريس
بعد ما يركب مع عروسته العربية وتديله المحفظة والموبايل والمفايتح لو هما معاك أو تتأكد انهم معاه وتشوفه لو عايز حاجة وتتأكد ان في حد هايوصل والده ووالدته واخواته وتطمنه وتتمناله حظ سعيد، واتأكد أن كل دا هيترد لك يوم فرحك.
تابعوا آخر أهل مصر على Google News
