كشفت المطربة شيرين عبد الوهاب تفاصيل أزمتها الأخيرة بعد تصريحاتها المسيئة بحق الدولة بإحدى حفلاتها في البحرين، وكتبت "شيرين" في منشور لها عبر حسابها الرسمى على موقع التواصل الاجتماعي فيسبوك: "عاوزة أتكلم من قلبي مع كل واحد من أهل بلدي الحبيبة، ومن أهلي وأصدقائي وزملائي؛ اللي قدروا يفهموا ويصدقوا إني لا يمكن أسيء لبلادي اللي أنا كلي من خيرها ولا يمكن أنكر فضلها عليا، بجد بأشكركم وبأحبكم، وبعتذر للي أساء فهم كلامي من كل قلبي".
وأضافت: "بالنسبة للقنوات المأجورة من خارج مصر، اللي خدت كلامي وخرجته عن سياقه تمامًا وحاولت تستغله ضد بلدي؛ بقولهم إن بلدي خط أحمر، وعمركم ما هاتفرقوا بيني وبينها، وأحب أوضح لكل الناس اللي حقهم يعرفوا إن ما كُتب عني في الصحافة ونسب لي غير صحيح بالمرة، وتقدروا تتحقوا من صحة كلامي من الفيديو الموجود مع إنه ممنتچ عن قصد علشان يطلعني غلطانة".
وأوضحت: "ما قيل على لسان النقابة والصحافة إني قلت (أنا هنا أتكلم براحتي عشان اللي بيتكلم في مصر بيتحبس)، وطبعًا ده مش حقيقي، وماقلتهوش، لأن الكلمة بتفرق!، اللي قلته نصًا وهو موجود بالفيديو "أنا هنا أتكلم براحتي عشان في مصر ممكن يسجنوني" - فيه فرق كبير بين الجملتين!".
وتابعت: "أنا كنت بتكلم عن موقف شخصي لما هزرت على المسرح من قبل ورُفعت عليا دعاوى وصدر حكم بسجني سنة وسددت كفالة، واستأنفت واتلغى الحكم في الاستئناف! وبعدين اترفع عليا جنحة مباشرة عن نفس الواقعة، واتحكم فيها بعدم اختصاص القضاء المصري بما وقع في الشارقة؛ هذا ما كنت أقصده والله أعلم بالنوايا.. بحبك يابلدي مهما حصل، ودايمًا تحيا مصر".
جدير بالذكر أن نقابة المهن التمثيلية قررت إحالة شيرين عبد الوهاب إلى التحقيق ووقفها عن الغناء على خلفية تصريحاتها في حفل البحرين.
تابعوا آخر أهل مصر على Google News
