خرج أحمد قمر طليق المطربة إيناس عز الدين عن صمته، بعد الهجوم التي تعرضت له بعد إدعاءها بأنها أصيبت بفيروس كورونا، وعند نقلها لحميات إمبابة بدأت برصد عيوب المستشفى، حيث أن الجمهور شكك في أنها تقصد الإساءة لمصر أمام الجميع.
طليق إيناس عز الدين
وتحدث طليق إيناس عز الدين عن فترة زواجهما مشيرًا إلى أنها كانت تمرض كثيرًا وتدخل المستشفى وذكر بأنها أجهضت لأكثر من مرة بسبب أنها تعاني من القولون. وكان كلامه هذا بعد أنباء عن شطب اسمها من نقابة المهن الموسيقية بعد تحديد موعد للتحقيق معها.
وكتب أحمد قمر طليق إيناس عز الدين: "اعذريني يا ايناس مش هقدر احافظ على كلمتي معاكي لحين التحقيق في الامر بشكل قانوني وافضل ساكت وشايف ظلم كبير واقع عليكي وتجاوزات في حقك انا لا يمكن اقبلها على انسانة عاشت في بيتي سنين ومش قادر حتى استنى لحد ما اتمالك اعصابي من اللي حاصل معاكي واقدر اطلع لايف اتكلم وهكتب البوست ده اولاً".
الهجوم على إيناس عز الدين
ورد على الهجوم الذي تتعرض له إيناس، وقال: "هرد على جزئية شايف ايناس بتتدبح قدامي فيها هل النقابة حققت مع ايناس قبل ما يتقال انه هيتم شطبها بشكل نهائي من النقابة هو انتوا بتحاسبوا الناس قبل ما تحققوا معاهم ولا بقى التحقيق دلوقتي عن طريق السوشيال ميديا وانها لازم تطلع تتكلم في السوشيال ميديا وتبرر مش فيه اجرائات قانونية لازم تتبع ويتم استدعائها للتحقيق وهل يا ترى اتحاد الكرة حقق مع محمد مجدي لاعب الاسماعيلي اللي دخل المستشفى بنفس السبب وهو كان معاها على نفس الطيار اللي راجعة من المغرب وقاعد في نفس المحيط بتاعها ونزل صورته على انه كورونا برضوا لانه جتله نفس الاعراض خاصة ان فعلاً كان معاهم مصاب وحالته ايجابية في الطيارة واتأكدوا من ده لما رجعوا مصر هل صدفة هي ومحمد مجدي اللي على نفس الطيارة وفي نفس المحيط يحصل معاهم نفس الشيء".
مرض إيناس عز الدين
وعن أزماتها المرضية قال: "طيب بتقولوا انها بتكتب كل شوية وتدعي انها مريضة علشان تعمل شو وانا النقطة دي انا بقى اللي لازم ارد عليها لانها كانت في بيتي ايناس من قبل جوازي منها وهي كل شوية تقع من اهلها وتروح مستشفيات من صغرها ومناعتها سيئة واقل حاجة بتصيبها ايناس دخلت بيتي ومن اول شهر حصل حمل و كان في توأم فرحتي و فرحة اهلي واهلها كانت ما تتوصفش ولا تتقدر بثمن لحد ما وصلت للشهر الرابع وحست بتعب ومش عارفة فيها ايه روحنا كشفنا وعملنا سونار في مستشفى المركز الطبي في اسكندرية ولقينا ان الاجنة ميتين والنبض متوقف وان حالتها خطر وهتدخل في تسمم حمل والدكتورة ادتها حبوب تحت اللسان علشان تجهضها من غير ما توسع الرحم و فضلت ٢١ يوم قدامي بتتعذب لحد ما اجهضت ومسكت ولادي اللي لم يكتمل نموهم وكانوا حتت لحم ميتين بين ايديا قولت عمرهم وهي كانت بتموت قدامي وعمري ما انسى شكلها وهي ماسكة لحمها وبتبكي انه مات حتى لما دخلت اراب ايدل حصلها مشكلة و نزيف في الاحبال الصوتية والقناة نفسها اللي اعلنت الكلام ده وانها ممنوعة من الغناء ٢١ يوم ومن الكلام ٤ ايام و وقتها غنت وهي تعبانة هل هتكذبوا كان مذيعة وادارة قناة mbc اللي قالوا كده بعد منظار حنجرة ليها هما كمان كدابين".
وتابع: "المهم اللي يعرف ايناس عارف قد ايه هي بتاخد كل حاجة على اعصابها بشكل شديد جداً وده كان بيأثر جامد على القولون لحد ظهرت معاها مشاكل المعدة والقولون واللي اتشخصت اكتر من مرة غلط واخدت ادوية كتير علط بوظت هرموناتها لحد ما زادت سوء وكنت بشوفها وهي بترجع دم قدامي و بتنزف من فتحة الشرج دم بالايام وانا وخالها وامها كنا نحتاس بيها وهي غرقانة دم في ايدينا انا اللي كنت بشيلها على كتفي وانا اللي كنت بمسح دمها وانا اللي كنت بشوفها وهي بتعاني كل شوية وتتشخص غلط وحملت في خلال المدة دي مرتين مرة الحمل نزل لوحده و مرة حالتها كانت حرجة و كانت هتدخل مننا في غيبوبة لان اعراض الحمل كانت بتقلب معاها بنزيف من الشرج من القولون و ترجيع دم وقطع نهائي للاكل وانا وخالها احتاسنا بيها في المستشفيات اللي كلهم اجمعوا ان الجنين لازم ينزل لانها مش هتتحمل لحد الولادة والكلام ده كله حصل في مستشفى القوات المسلحة في اسكندرية وبجواب من النقابة دخلت المستشفى وكانت حامل في الشهر التاني واخذنا وقتها تقرير من دكتور جهاز هضمي و دكتور تاني جراح وبناءاً على التقارير دي تم اجهاضها وكأنها بتتحرم غصب عنها من الامومة في عز شبابها رغم انها ما عندهاش مشاكل في الحمل نفسه لكن مشاكلها كلها في القولون وتمنع استمرار الحمل لحد ما اتعمل مناظير معدة و قولون وتم التشخيص ان عندها فتاء في المعدة و ورم في القولون و اخدوا منه عينة وهي وقتها قالت انا ان عندها ورم ومستنية تعرف خبيث ولا حميد لحد ما ربنا من رحمته بيها طلع مجموعة التهابات شديدة على مدار سنوات اتجمعت على بعض وعملت كتلة كبيرة حميدة في القولون وكل يوم في المستشفى واغلب دخولها المستشفى والمناظير والتحاليل والاشعة اللي كانت بتعملها كانت بتكون من جوابات رسمية من النقابة بتاعتها ويقدروا يراجعوا الايصالات بتاعة تحويلها لمستشفى القوات المسلحة و معمل الفا ومعمل البرج وغيره وغيره وطبعاً الايصالات دي بتتحول للحسابات لانها عضو عامل في النقابة فأي ايصال بيطلع بتروح بيه المستشفى هي بتدفع 25% من قيمة دخولها وعلاجها وحجزها او تحاليلها واشعتها ومناظيرها والنقابة بتدفع 75% فأكيد كل الايصالات والحسابات دي موجودة بالنقابة".
إيناس عز الدين والسوشيال ميديا
وأضاف: "غلطتها انها كانت بتتعامل بهبل مع واقع السوشيال ميديا واي حاجة تحس بيها تكتبها فرحانة زعلانة تعبانة مسافرة تخنانة خاسة كل تفاصيلها كانت بتكتبها بكل حسن نية و كل الناس عارفين ده عنها وكانوا بيقولولها ده سبب قربك مننا وخليكي دايماً زي ما انتي ما تتغيريش لاننا بنحسك واحدة مننا مش بتتكلم بالشوكة والسكينة ولانها عمرها ما توقعت ان ممكن الناس تتعامل بالشكل ده الناس سابوا ان ايناس معروف عنها انها بتكتب كل حاجة في الحياة على الفيس بوك حتى وقت جوازنا لو زعلانين كانت تعاتبني ببوست علشان اصالحها لانها على نياتها وانا اكتر حد يقدر يحكم بده لانها عشرة سنين وانا مربيها على ايدي وشوفت طباعها وتصرفاتها اللي كلها مش محسوبة ولا مدروسة واللي بيقولوا انها كانت بتعمل شو بمرضها".
وعن تأثير مرضها على عملها قال طليق إيناس عز الدين: "انتوا تعرفوا ان مرضها وتعبها المتكرر ضروها في شغلها وكانوا بيبعدوا عنها الشغل كتير لان الناس بتخاف تشتغل مع حد بيتعب ويدخل مستشفيات كل شوية دي حتى لما عملت نحت دهون طلعت تقول للناس لايف خطوة بخطوة عملت ايه وبرضوا لما عملت تكميم نفس الكلام سيبتوا كل ده وبتقولوا انها بتدعي المرض يعني مش بتكتب كل حاجة في حياتها بما فيها المرض وانتوا لغيتوا كل حاجة ومسكتوا بس في جزئي التعب والمرض اللي كانت بتكتبهم في بوستات لما تحس بيهم اللي النقابة تقدر تثبتها من خلال الاوراق والحسابات اللي عندهم واللي بتثبت كل كلامي والناس اللي مسكوا في بوستات لاراء قديمة ليها واضح انها اتغيرت بدليل انها بقالها سنتين مش بتتكلم في السياسة ولا بتقول اي اراء مسكوا في بوست وتعليق قديم وهاتك يا سلخ وتخوين طيب ما تجيبوا بوستات اقدم لما نزلت ضد الاخوان ولا عملت اغنية ضد مرسي طب بلاش ما تجيبوا بوستات احدث وهي بتشكر في قرارات الحكومة ولا انتوا استهدفتوا بوست محدد من سنتين علشان ترموا عليه اتهاماتكم ليها دلوقتي. عشرتي معاها عمرها ما هتخليني اتفرج عليها بيتقطع في لحمها واسكت انا اتكلمت دلوقتي في الجزئية دي لحد ما اطلع لايف واتكلم في تفاصيل المشكلة الاخيرة واللي هي اتكلمت فيها وماحدش سمعها ده غير كم تصفية الحسابات اللي بيتعمل فيها وكم الناس اللي عايزة تدعي الوطنية على حساب تخوينها وانهم يطلعوها عميلة واخوان وداخلة بالبرص في شنطتها هي وصلت لكده".
حالة إيناس عز الدين
وأختتم كلامه: "انا اسف يا ايناس وعارف وضع حالتك دلوقتي شكله ايه وقد ايه انتي لسه تعبانة وحالتك زي الزفت ومش متحملة بس مش هقدر اشوفك بيتقطع فيكي واسكت وانا جنبك ومعاكي انا واهلك لاننا حضرنا وشيلنا تعبك ومرضك سنين على كتافنا وهنفضل جنبك لحد ما يتم التحقيق رسمي وتقولي كل اللي عندك بشكل قانوني لان الكلام مافيش اسهل منه لكن اثبات الحقيقة هو ده اللي لازم يتعمل بالقانون، ربنا يعينك على اللي انتي فيه دلوقتي وعلى وضعك الصحي اللي زي الزفت ويعين كل انسان سبك وخاض فيكي وفي عرضك وفي اهلك الطيبين المحترمين على نفسه لانهم شياطين مش بشر وكل اللي كانوا بيمثلوا انهم اصحابك وبيحبوكي وطول الوقت جنبك ومعادنهم بانت في شدتك ولما وقعتي كله سن السكاكين ودبح فيكي، وتتساقط الاقنعة".
إيناس عز الدين وفيروس كورونا
وكانت إيناس عز الدين منذ أيام أثارت الجدل بعدما خرجت على السوشيال ميديا وأعلنت بأنها مصابة بفيروس كورونا مما آثار الرعب في قلوب متابعيها ونجوم الفن، وبدأت برصد خطوة بخطوة لحظة ذهابها لمستشفى حميات إمبابة واظهار مساوئ المستشفى مما جعلها تسيء لمصر وتزعزع قلق المصريين، وهاجمت وزارة الصحة حتى خرجت نتيجة التحليل لفحص كورونا سلبية مما جعل الجمهور يراها بأنها كانت تدعي المرض.
تابعوا آخر أهل مصر على Google News
