انهارت الفنانة وفاء مكي على الهواء، خلال حلولها ضيفة على برنامج 'ملفات'، المذاع عبر قناة 'هي'، وذلك تأثرا بتصريحات الفنانة ميار الببلاوي مؤخرا، التي أدلت بها وأوضحت فيها أن وفاء كانت بريئة من تهمة تعذيب وحرق الخادمتين، التي سجنت فيها لمدة 3 سنوات.
وسألت المذيعة وفاء مكي عن هل تسامح ميار الببلاوي بعد ان سكتت لمدة 23 سنة عن الإدلاء بهذا الكلام؟، لترد وفاء وهي تبكي قائلة: 'لا لا، أنا قلت فيوم من الأيام ربنا هيظهر الحق وكنت محروق وربنا سمع دعايا، كانت خايفة على ابنها وانا مش خايفة على ابني؟، عارفة لو من 5 او 6 شهور من ساعة مبعت الاستغاثة كانت فرقت والله'.
وتابعت هي منهارة:'أنا جوايا متلخبطة، معنديش حاجة اقولها، ضعت وعمري ضاع عليه العوض ومنه العوض، مش عارفة عملت كده ليه كانت بتنام ازاى؟، الحمد لله ده ابتلاء ربنا ابتلاني لحكمة يعلمها الله ربنا اسمه العدل وخلاها تنطق بلسان الحق'.
وكانت الفنانة ميار الببلاوي، كشفت مؤخرا عن أسرار تذاع لأول مرة في قضية الفنانة وفاء مكي، التي اتهمت بتعذيب خادمتيها، بعد مرور 23 عاما على تلك الحادثة.
وقالت ميار الببلاوي، في تصريحات لبرنامج 'صبايا الشمس'، من تقديم الإعلامية ريهام سعيد: 'الموضوع تم فتحه حاليا وأنا متكلمتش فيه، وأنا مريضة قلب ومفيش مرة دخلت عملت عملية إلا ما بقيت قبلها أدعي ربنا يمد في عمري لحد مقول كلمة الحق'.
وأضافت ميار الببلاوي: 'أنا كنت عاوزة أقول حاجة بس مش عارفة الطريق، وجوايا صراع إن كلامي دا هيعمل حاجة ولا لأ، بقالي 23 سنة تعبانة، وبقول يا ترى لو كنت قولت شهادتي كان هيتاخد بكلامي'.
وحكت ميار الببلاوي تفاصيل الحكاية قائلة: 'لما اتجوزت مكنتش شاطرة ومش بعرف أعمل حاجة في البيت، وجوزي كان عاوز يجبلي ناس تساعدني، كان معايا بنت بتساعدني مدة طويلة واتجوزت ومشيت، وبوابة العمارة قالتلي في واحدة تحت معاها بنتين عاوزين يشتغلوا'.
وتابعت ميار الببلاوي: 'بنت منهم هرشت في شعرها ولقيت شعرها أقرع، وقولتلها إيه دا، قالتلي دول اللي كانوا عند الأستاذة وفاء مكي، والبنت عندها قراع ووفاء حلقتلها شعرها، ورفضت أن تعمل البنتين معي، لكنهما كانتا بصحة جيدة، لكن خفت من اللي عندها قراع إنها تعدي ابني'.
وواصلت ميار الببلاوي: 'شهادتي اللي بقولها إن البنتين جم من عند وفاء مكي، مكانوش محروقين ولكن حالقين شعرهم، والست مشيت وأخدت البنات، ثم فوجئت بكلام الجرائد عن تعذيب البنات، ولما شوفت صورهم قولت دول اللي الست كانت جيباهم لي وكلمت صحفي معروف، وكان صديق عزيز ليا أنا ووفاء، وقولتله الموضوع دا غلط ووفاء معملتلهومش حاجة، وهما جم من عند وفاء مكي لعندي، ثم راحوا البلد والمصور قالي فيه شخصية عاوزة تئذي وفاء، وكلامك مش هيقدم ولا هيأخر'.
واختتمت ميار الببلاوي: 'كل الكلام دا كان من 23 سنة، وربنا مد في عمري عشان أقول كدا، والحمد الله إني قولت والموضوع دا كان تاعبني'.
وعلقت الفنانة وفاء مكي على تصريحات الفنانة والإعلامية ميار الببلاوي، وقالت في بث مباشر لـ'أهل مصر': 'ميار الببلاوي كتمت شهادة الحق عشان ابنها، من حقها تخاف على ابنها كان هيندبح وسفروها بعد ما القضية خلصت'.
وأضافت وفاء: 'أنا مش عارفة أقولها إيه الحمد لله، ربنا يسامحها ويسامحنا، دا ابتلاء وربنا إذا أحب عبد ابتلاه، أنا فيه حد قالي تعليق على فيسبوك ماذا بينك وبين ربنا يا وفاء يا مكي لتظهر الحقيقة بعد 23 سنة، ودي كلمة أسعدتني'.
وكانت الفنانة وفاء مكي اتهمت في قضية تعذيب خادمتهيا عام 2001، وتم الحكم عليها بالسجن عشر سنوات، مع الشغل والنفاذ، ولكن تم تخفيف الحكم بعدها إلى ثلاث سنوات لتخرج عام 2004.
تابعوا آخر أهل مصر على Google News
