بطريقة عامية.. دار الإفتاء تحتسب قيمة زكاة الفطر

كشفت در الإفتاء، اليوم الأربعاء، احتساب مقدار الزكاة لعيد الفطر، بطريقة سهلة وميسرة حتى يتسنى للجميع كيفية احتساب الزكاة.

وقالت دار الإفتاء، عبر صفحتها الرسمية، على موقع التواصل الاجتماعي، 'فيسبوك': 'اعرف دار الإفتاء المصرية قدرت قيمة زكاة الفطر أزاى بطريقة سهلة وبسيطة وميسرة ولغة عامية أيضًا سهلة وبسيطة'.

احتساب قيمة الزكاة بالطريقة العامية

وتابعت: 'حسبناها على القمح اللى بيتعمل منه العيش اللى كل الناس في مصر بتاكله لأن بيوت كتير مش بتاكل لا رز ولا تمر ولا زبيب

طيب سعر أردب القمح كام ١٧٠٠ جنيه، والأردب فيه ١٥٠ كيلو، يبقى سعر الكيلو كام ١١.٣٣ إحدى عشر جنيه وثلاثة وثلاثون قرشًا'.

وأضافت: 'طيب والزكاة أد ايه ٢.٠٤ كيلو، يبقى نضرب ٢.٠٤كيلو * ١١.٣٣، يطلع الناتج ٢٣.١١، ودار الإفتاء قالت إنه ٣٠ جنيه يعني زودت كمان عن الحد الأدنى بشوية، و ٣٠ جنيه الحد الأدنى يعني طلع أكتر من ٣٠ جنيه لو معاك ودخلك يسمح لك، بس اللى مش هيقدر فأقل حاجة يطلعها عن الفرد ٣٠ جنيه'.

وتابعت: 'طيب أنا شايف إن ٣٠ جنيه قليل مش هتعمل حاجه يبقى تطلع ما ترضاه نفسك وتحس إنه له قيمة لكن لا تقل عن ٣٠ جنيه ولا تلزم غيرك يطلع زيك لأن ممكن يكون غير قادر، وتخرج قبل صلاة العيد'.

واختتمت دار الإفتاء، منشورها قائلة: 'لو ملحقتش تطلعها ممكن تاخد برأي السادة الشافعية إنك ممكن تطلعها قبل غروب شمس يوم عيد الفطر'.