نفى همرو اللقاني نائب رئيس مجلس إدارة شعبة الذهب بالغرف التجارية، ما يتردد حول تسعير محلات الذهب والصاغة الدولار عند 40 أو 50 جنيهًا، مؤكدا أن هذا كلام عار تمامًا من الصحة، معقبًا: 'مفيش حد من بتوع الدهب بيبص على الدولار بكام لأنه مش بيشتري دولار عشان يجيب ذهب'.
وقال في تصريحات خاصة لموقع وجريدة 'أهل مصر'، اليوم الأحد، إن استيراد الذهب من الخارج غير متاح الفترة الحالية، لذلك شراء الذهب يكون من الزبائن المصريين، متابعًا: 'ما يحدث هو رفع الأسعار لإغرائهم ببيع الذهب لمحلات الصاغة، واللي بيحصل في ناس بتبيع دهب عشان فيه ناس تانية عايزة تشتري والصاغة معندهاش ذهب كفاية'.
الذهب في محالات الصاغة
وأضاف: 'أنا مش ببص على الدولار بكام بدليل أن سعر الذهب بيطلع وبينزل بـ100 جنيه في خلال 5 دقايق، أنا بتجيلي ناس بيقولي الذهب بكام عشان ابيعه بقوله بـ2500 جنيه يقولي لما بيبقى بـ2600 جنيه هبيع، أقوله طب تعالى ياعم اهدى عليا، لأن في شخص في الناحية التانية بيطلب مني يشتري الذهب باي سعر حتى لو 2600 جنيه، هذا الشخص هو اللي زود السعر'.
شهادات الادخار الـ18%
وتابع: 'الحسبة هي في زبون جاهز والفلوس في جيبه عنده استعداد يشتري الذهب لو الجرام بـ3 الاف جنيه، في ناس عايزة تشتري الذهب باي سعر حتى لو كيلو، واحد باع شقته ومعه فلوس، أرباح شهادات الادخار الـ18% في ناس فكتها والحكومة مقدرتش تستوعب هذه الشهادات لأنه لو كانوا عملوها بـ25% كانت استوعبت'.
وأردف: 'اللي فكوا الشهادات اشتروا بيها ذهب، وكل شوية واحد بيتشري 50 جرام و100 جرام، ولو في 10 طلبات بـ100 جرام بقى المطلوب كيلو، وارتفاع سعر الذهب ليس له علاقة بارتفاع الدولار في السوق السوداء'.
وأتم: 'أنا قاعد مستني لما الحكومة تفتح الاستيراد نبقى نستورد، لو الحكومة فتحت الاستيراد هيكون التعامل بالسعر العالمي للذهب'.
تابعوا آخر أهل مصر على Google News
