عشقه للتصوير منذ طفولته جعله يتفنن فى تقديم جلسات تصوير مُختلفة، تنال العديد من الإعجابات، حيث اختص بتصوير المواقع الأثرية لتنشيط السياحة، إلا أنه اهتم مُؤخراً بتصوير الحيوانات.
مصطفى إيهاب حسونة، صاحب الـ20 عاماً، أحد أبناء محافظة كفر الشيخ، الطالب بالفرقة الثالثة بكلية الطب ـ جامعة مصر للعلوم والتكنولوجيا، حرص على توثيق لحظات 'كلب' من كلاب الشوارع، فى 'فوتوسيشن' جديد لفت أنظار المُتابعين، فى مُحاولة منه لنشر فكرة التراحم بين أفراد المُجتمع، وتعريفهم أن للحيوانات حقوق كالبشر.
يقول'بحب التصوير جداً وبدأت فى دخول مجال التصوير من حوالى 6 سنوات، وكانت بدايتى فى تصوير المواقع الأثرية والشوارع الهامة فى مسقط رأسى بكفر الشيخ، وبعد التحاقى بكلية الطب جامعة مصر للعلوم والتكنولوجيا، كُنت حريص على أخذ كاميرتى الشخصية وتصوير بعض معالم القاهرة'، بهذه الكلمات بدأ 'حسونة'، حديثه، لـ'أهل مصر'.
وأضاف 'حسونة'، 'فكرت فى تصوير 'فوتوسيشن' جديد لكلب بلدى فى أحد شوارع مدينة السادس من أكتوبر بالقاهرة، لأنى بحب الكلاب وفقدت كلبى من حوالى شهر، لأنه مات بعدما أصيب بمرض البارفو، وكان كلبى نوعه 'جريفون'، وهو مختلف عن الكلاب العادية، وحسيت لما شوفت الكلب بالحنين لكلبى، وده يمكن إللى خلانى أفكر فى عمل 'فوتوسيشن' للكلب وفاءً لكلبى الذى فقدته'.
منذ انتشار فيروس 'كورونا' المُستجد، وأصبحت أعداد الكلاب تزداد بشكل كبير فى شوارع القاهرة، بحسب 'حسونة'، مضيفًا: 'الكلاب من ساعة موضوع الكورونا وهما موجودين في الشوارع بكثرة، وأنا لما كُنت بصور لفت انتباهى الكلب اللى عملتله فوتوسيشن، وأنا عشان بقالى مدة مُهتم برضو بتصوير الحيوانات روحتله عشان أصورو، وكان معايا زميلى وقالى إن هو هيتحرك أوهيغدر حاجة من الاتنين فقربت منه لقيت الكلب ودود جداً، وكُل الكلاب الفترة دى فى الشارع كده على طول'.
وتابع 'حسونة'، 'الكلب كان موجود فى مكان معروف فى مدينة السادس من أكتوبر، وكان بيبقى على طول زحمة فى الأيام الطبيعية زمان، والكلب كان واخد راحته جداً، ولاحظ إنى بقرب منه، والظريف من الموضوع إنه زى ما يكون كان بيضحك، بدأت أقرب منه ومع شوية لعب معاه وقف فى نص الطريق، وفضلت أصور فيه، والكلب حقيقى أزهلنى الصراحة زى ما يكون عارف إنه بيتصور، صورته من كذا زاوية صور جميلة، ووقت ما كُنت بصورو فى الآخر اتجمعت مجموعة كلاب تانية كتير حوالينا واحنا واقفين ولما مشينا مشيو ورانا زى ما يكونوا كانوا بيطلبوا منى إنى أصورهم هُما كمان'.
'حسونة' مُستمر فى عمله فى التصوير حتى بعدما يُصبح طبيباً، حيث يُوضح: 'التصوير عندى هواية يعنى مش بصور بمُقابل مادى، لأنى بصور لنفسى، وبسلى وقتى، وده شئ بيفرحنى، وهفضل أمارس هوايتى فى التصوير حتى وأنا طبيب إن شاء الله'.
تابعوا آخر أهل مصر على Google News
