قال كرم سعد، أخصائي أطفال، ومدير مستشفى الواسطي المركزي، شمال بني سويف، اليوم، السبت، إن هناك أعراض للإلتهاب الحنجري للأطفال، وخاصة مع وجود أعراض نزلة البرد لديه، ما يعرض حياتهم للخطر.
وأوضح مدير مستشفى الواسطي ببني سويف، عبر صفحته الشخصية، أعراض الالتهاب الحنجري للأطفال، قائلا: 'الطفل أحيانا بيكون عنده نزلة برد خفيفة، وفجأة تلاقي صوته مبحوح، أو ينام زي الفل ويصحى وش الفجر بيعيط بصوت مبحوح أو صوت غريب مزعج، ده إسمه إلتهاب حنجري'.
وأضاف سعد، أن الإلتهاب الحنجري له أنواع، مثل: 'نتيجة حساسية، عدوى فيروسية، عدوى بكتيرية'، موضحا: 'وده في الكبار غالبا مش خطير، لكن في الأطفال ممكن يكون خطير جدا، وممكن كمان والعياذ بالله يهدد حياة الطفل لو درجته شديدة ومتلحقش'.
وأردف الطبيب،: 'علشان كده لو ده حصل مع طفلك، وحسيتي بتغيير في صوته من الأول كده لازم يتعرض على طبيب، وهو اللي هيحدد درجة الالتهاب الحنجري، وعلى أساس درجته هيوصف العلاج المناسب، يعني من بداية حدوث تغيير في صوت الطفل، أو صوت بكائه لازم يتعالج علشان ما نوصلش لحالة اختناق حنجري، ونجري وش الفجر في المستشفيات علشان الطفل ياخد جلسات أو ممكن يتحجز'.
وأشار أخصائي الأطفال، إلى أنه إذا كان الطفل عمره أقل من سنة، فمن الممكن أن تتدهور الحالة بشكل أسرع بكثير، موضحا: 'ولو فيه حرارة عالية فوق 38.5، مع الاختناق الحنجري ده غالبا بيكون أسوأ نوع، وهو البكتيري، والطفل هيحتاج أشعة وحجز بالمستشفى، علشان كده لازم ناخد بالنا كويس ونهتم'.
تابعوا آخر أهل مصر على Google News
