أدلى 'ماهر.أ.هـ.أ'، 27 عامًا، السائق المتهم بقتل شقيقه بالتعاون مع زوجته، بياعة السمك، في قرية سكرانة التابعة لمركز مطوبس بمحافظة كفر الشيخ، على أثر علاقته الآثمة بها، باعترافات تفصيلية أمام جهات التحقيق، حول الواقعة، وتنفرد 'أهل مصر' بنشر نص هذه الاعترافات الصادمة.
المتهم بقتل شقيقه
"أهل مصر" تنفرد بنشر نص اعترافات قاتل شقيقه
وجاء في نص الاعترافات ما يلي:
س: ما هي تفصيلات اعترافك بشأن الواقعة محل التحقيق؟
ج/ اللي حصل إن أنا أخويا اتسجن من حوالي 3 سنين في قضية سلاح ومخدرات، وأخد فيها حكم 3 سنين، وكنت واقف معاه في القضية دي وبصرف عليه ومكنش فيه أي مشاكل بيني وبينه خالص، ومن حوالي سنتين روحت لنيرة مرات أخويا وحاولت أتكلم معاها، وأعرف إيه اللي حصل لأني لقيت بطنها بتكبر وقالت لي أنها حامل من واحد غريب مش من البلد، من اللي بيفرشوا بالغزل بتاع السمك ومعرفش اسمه، وقولت لها هقف معاكي في المشوار ده، وجبت لها علاج من الصيدلية علشان تسقط بس مجابش معاها نتيجة، وبعدها لما بقت في الشهر الثامن روحت ودتها المستشفي علشان تولد فيها وولدت قيصري وطلعت في نفس اليوم، وخلفت بنت واتحجزت في الحضانة في المستشفي علشان كانت تعبانة ومسجلتهاش بأي اسم وبعد 3 أيام روحت استلمتها من المستشفى وبعد كده طلعت روحت ادفينا وحطتها على باب جامع بعد صلاة العشاء، ومرات أخويا نيرة كلمتني علشان تسأل على البنت قولت لها إن البنت ماتت، وأنا دفنتها علشان متوجعش دماغي وكل شوية تكلمني عليها.
وتابع المتهم في اعترافاته: بعدها بفترة الشيطان خلاني أعاشر نيرة مرات أخويا معاشرة الأزواج، وبعدها أخويا خرج من السجن وكانت حصلت قصة إن أنا ضربت مراته نيرة، ومراته التانية بسبب أنهم كانوا شتموني علشان حملوا سمك في العربية بتاعتي زيادة، وقعدت مع أبويا وأخويا نادر وعملنا قاعدة واتصافينا في الآخر، وأخويا بقي في حاله وأنا في حالي، وكان في أرض كنا شارينها أنا وأبويا وأخواتي بفلوسنا، ونادر أخويا الله يرحمه ملوش فيها أي حاجة خالص، ودخل ووقف فيها وقال أنا ليا في الأرض وعايز يشاركنا فيها، وهو ملوش حق وابتدت المشاكل وكذا مرة تحصل خلافات بينا بسبب القصة دي وأخويا كان بيهددني، ويقول لي هقطعك وأدبحك لو جيت على طريقي.
مرات أخويا كانت بتعرفني تحركات جوزها
وأردف: أنا عندي عربية نقل بحمل عليها بوكسات السمك، وزوجات إخواتي بكلمهم كل يوم الصبح عشان أشوف مين فيهم اللي هيسرح معايا، وفي يوم وأنا بتصل على تليفون نيرة الصبح وبقولها صباح الخير يا قمر، لقيت اللي بيرد عليا نادر جوزها أخويا، وقال لي عرفت منين إن هيا قمر قولت له دا ضلمة ولا تزعل نفسك، وقعد يشتمني في التليفون وأنا شتمته وشدينا جامد، وبعدها كان في تواصل بيني وبين نيرة بخصوص الشغل وفي يوم جه الأرض، ووقف لأبويا وحط إيده على قيراطين ونص من الأرض بتاعتنا، ووقتها نيرة مراته كانت واقعة معاه وفيه مشاكل جامدة بينهم، وكانت عايزة تخلص منه، وكانت بتكلمني وتعرفني تحركاته، وعرفت قبل الواقعة بيوم إن أخويا بيروح الأرض كل يوم بعد المغرب، وهي كلمتني يوم الواقعة 'الخميس 18-11-2022'، وقالت لي إنها رايحة الأرض معاه، وطلبت تشوفني، وهي كانت عايزة تخلص منه بسبب الخلافات اللي كانت بينهم، وأنا فعلًا يومها شوفته وأنا رايح الأرض بتاعتي، وكان قاعد هو ومراته على البيارة، وكان معايا الكوريك في إيدي، فقولت له السلام عليكم، وقالي الله لا يسلمك أنت إيه اللي جابك هنا، قولت له أنا رايح أرضي ومشيت روحت مشغل المكنة بتاعتي في الأرض، وأنا راجع من الأرض بتاعتي ورايح ناحيته كان قاعد زي ما هو وضهره ليا، وكنت ماسك الكوريك في إيدي اليمين وضي القمر خلاه يشوف خيالي فهو حس بالغدر، وخاف وقام وقف ووطي على الأرض وشال قالب طوب أبيض، ولسة هيلف ناحيتي روحت خابطة بالكوريك على راسه من ورا، ولما لف وشه ليا خبطته بالكوريك على وشه وقع على الأرض وكان وشه غرقان دم، فأخدت الكوريك وجريت على السكة ونيرة جريت ورايا، وطلعنا على السكة عند مصرف المشروع الجديد، ورميت الكوريك في المصرف.
قاتل شقيقه بكفر الشيخ: رحت أجيب رمل وزلط علشان أدفنه
وأكمل الجاني في اعترافاته: قولت لنيرة روحي على بيتك ومتجبيش سيرة لحد باللي حصل، فروحت وأنا روحت بيتي ونمت وتاني يوم قومت حملت الأنفار على العربية، وروحت السوق ومراتي كلمتني وقالت لي أن أخويا عمل حادثة بالعربية ومات، والكلام انتشر إن مناع لقوه في الأرض مضروب بالنار، وسبت الأنفار في السوق وروحت أشوف، ولقيت الحكومة كلها واقفة هناك، وبعدها روحت أجيب رمل وزلط علشان دفنته.
س: ما سبب ومناسبة وجودك في المكان والزمان سالفي الذكر؟
ج: كنت رايح الأرض بتاعتي اللي هي جنب الأرض بتاعت أخويا نادر.
س: من كان برفقتك آنذاك؟
ج: كنت رايح لوحدي.
س: وما هو تحديدًا سبب إقدامك على ارتكاب تلك الواقعة؟
ج/ هو لما نيرة مراته حصل خلافات بينها وبين أخويا، ابتدت المشاكل تزيد وأنا كمان كان فيه بيني وبينه مشاكل، وكان مزهق العيلة وكان عايز ياخد أرضنا عافية، وكل شوية يقول هدبح وهقتل وهعمل وهخلي فيكم، ومراته ابتدت تتواصل معايا في الوقت ده وبتعرفني تحركاته علشان أشوفها ويوم الواقعة مراته كلمتني، وقالت لي إن هما رايحين الأرض وعايزة تشوفني، ووقتها أخدت الكوريك وروحت وأنا معدي لقيتهم قاعدين على بير الميه، وقولت لهم السلام عليكم وحصل اللي قولت عليه قبل كده'.
س: وما هي طبيعة الخلافات التي بينك وبين شقيقك المتوفى إلى رحمة مولاه؟
ج: كانت خلافات على الأرض والميراث، وكان عايز ياخد حق مش من حقه، وبيهددنا على طول أنه هيقتلني.
س: وهل فكرت من قبل وبدر إلى ذهنك وعقيدتك إزهاق روح شقيقك المتوفى لرحمة مولاه تعالى؟
ج: لا.
س: وهل دار بينك وبين المتوفى لرحمة مولاه ثمة حوار؟
ج: أيوة.
س: وما هو مضمون ذلك الحوار تحديدًا؟
ج: أنا عديت وقولت له سلام عليكم رد عليا، وقال لي الله لا يسلمك إنت إيه اللي جابك من هنا، ولما ضربته بالكوريك شتمني وقال لي يا ابن الـ...
س: وهل قمت بإعداد ثمة أدوات أو أسلحة أو آلات من أجل ارتكاب تلك الجريمة؟
ج : لا بس كان معايا الكوريك اللي باستخدمه في الأرض.
س: وهل دار بينك وبين المتهمة نيرة ثمة حديث آنذاك؟
ج: أيوة.
س: وما هو مضمون ذلك الحوار؟
ج: هي صوتت وأنا كنت مصدوم من اللي حصل، وطلعت أجري وقولت لها روحي ومتجبيش سيرة لحد وامسحي رقم التليفون بتاعي.
س: وكم عدد الضربات التي وجهتها صوب المتوفى لرحمة مولاه تعالى؟
ج: أنا ضربته ضربتين.
س: وأين استقرت تلك الضربات تحديدًا بجسد المتوفى لرحمة مولاه تعالى سالف الذكر؟
ج: على راسه من ورا ووشه.
س: وما الذي بدر منه آنذاك؟
ج: هو لما شاف خيالي وأنا وراه خاف وقام ووطى وجاب بلوك طوب أبيض من الأرض، روحت خابطه على راسه من ورا، ولما لف خبطته على وشه.
س: وهل أبصر أحد حدوث تلك الواقعة تحديدًا؟
ج: مفيش حد شاف الواقعة غير نيرة مرات أخويا الله يرحمه.
س: حدد لنا المدة الزمنية المستغرقة في تنفيذ الجريمة محل الواقعة تحديدًا؟
ج/ حوالي دقيقة.
س: ومتى بيّت النية وعقدت العزم على إزهاق روح شقيقك المتوفى لرحمة مولاه؟
ج: أنا مبيتش النية ولا أي حاجة، وأنا وقتها كنت خايف من أخويا أحسن يموتني لأنه كان بيهددني على طول بسبب قصة الأرض والمشاكل اللي بينا من يوم أخويا الله يرحمه ما طلع من السجن، وأنا لو مكنتش قتلته كان أخويا هيقتلني.
س: ألم تتراجع أو تتردد خلال تلك الفترة عن قرارك بقتل شقيقك المتوفى لرحمة مولاه تعالى؟
ج:لا.
س: وما الذي حال دون ذلك ؟
ج: علشان أنا لو مكنتش قتلته كان هو هيقتلني.
س: وما هو تحديدًا سبب إقدامك والمتهمة نيرة علي قتل شقيقك المتوفى لرحمة مولاه تعالى؟
ج: هي جت بظروفها واللي حصل قولت عليه ومعنديش أي كلام أقوله تاني.
س: ما هي طبيعة العلاقة فيما بينك وبين المتهمة نيرة؟
ج/ الشيطان كان دخل ما بينا وعاشرتها معاشرة الأزواج، وهي ست مش كويسة، وكانت لجأت ليا وقالت لي إنها حامل من واحد غريب من الناس اللي كانوا بييجوا يفرشوا غزل السمك عندنا في البلد، وأنا معرفش، أنا سمعت، وساعدتها في الولادة بتاعتها ووقفت معاها، وأخدت البنت من المستشفى ووديتها على باب جامع بقرية إدفينا ومش فاكر اسم الجامع، وهي اللي كانت عايزة تخلص من جوزها بسبب المشاكل ما بينها وبينه.
س: وهل من ثمة خلافات فيما بينك وبين سالفة الذكر؟
ج/ أيوة.
س: وما هي طبيعة تلك الخلافات تحديدًا؟
ج/ مفيش أي خلافات بيني وبينها غير على حمولة السمك، وكنت ضربتها مرة عشان شتمتني وعلت صوتها عليا، وقعدت مع أخويا قاعدة عرفية واتراضينا في آخر القعدة.
س: ومتى تحديدًا نشأت تلك العلاقة الآثمة فيما بينكما؟
ج/ من حوالي خمس شهور.
س: وأين تحديدًا كانت تتم تلك العلاقة الآثمة؟
ج/ كانت في بيت أخويا نادر.
س: وكم يبلغ عمر الطفلة التي أنجبتها المتهمة الآن؟
ج: عمرها حوالي سنتين.
س: وأين توجد تلك الطفلة الآن؟
ج: أنا من سنتين بعد الولادة ولما البنت خرجت من الحضانة سبتها على باب جامع بقرية إدفينا، مركز رشيد محافظة بالبحيرة، ومعرفش أي حاجة عنها من ساعتها.
س: وهل أثبت بثمة أوراق رسمية اسم تلك الطفلة نجلتك؟
ج : لا.
س: ولأي والد نسبت تلك الطفلة تحديداً؟
ج : أنا مسجلتهاش أصلا ولا ليها أي ورق خالص، ومعرفش أي حاجة عنها خالص من يوم ما سبتها على باب الجامع.
س: وما هو قصدك والمتهمة نيرة تحديدًا من ارتكاب تلك الواقعة؟
ج/ مراته كانت عايزة تخلص عليه وأنا كان فيه بيني وبينه مشاكل كتير علي الأرض وخلافات وأخويا الله يرحمه هددني أكتر من مرة قبل الواقعة أنه هيقتلني ومراته هي اللي قالت لي علي المكان اللي كانوا فيه وتحركاته ولو مكونتش قتلته كان هو هيجي يوم ويقتلني.
س: أنت متهم وأخر معلوم وهو المتهمة 'نيره.م.أ.ح' بقتل شقيقك المتوفي إلى رحمة مولاه تعالي نادر السيد هنيدي أبو خليل عمدًا مع سبقي الإصرار والترصد بأن بيتم النية وعقدتم العزم وأعددتم العدة لذلك سلاح أبيض (كوريك) وما إن ظفرتم بالمتوفي إلي رحمة مولاه تعالي بأن باغتوه بعده ضربات محدثین إصابته والتي أودت بحياته قاصدين من ذلك إزهاق روحه وذلك علي النحو والكيفية المبينة بالتحقيقات؟.
ج: معرفش أنا عملت كده إزاي بس مرات أخويا نيرة هي اللي ساعدتني وحصل اللي قولت عليه.
الإعدام لبائعة الأسماك قاتلة زوجها بمعاونة شقيقه
وقضت محكمة جنايات فوه، الدائرة الثانية، أمس الثلاثاء، حضوريًا، وبإجماع آراء أعضائها، بالإعدام شنقًا لبائعة الأسماك المتهمة بقتل زوجها بمعاونة شقيقه علي خلفية علاقة آثمة بينهما، وألزمتهما المحكمة المصاريف الجنائية، وبإحالة الدعوي المدنية للمحكمة المدنية المختصة، وذلك في أحداث القضية رقم 14868 لسنة 2022 جنح مركز شرطة مطوبس، والمقيدة برقم 2880 لسنة 2022 كلي كفر الشيخ.
صدر الحكم برئاسة المستشار خالد قطب بدر الدین، رئيس المحكمة والدائرة الثانية، وعضوية المستشارين هشام شريف الشريف، حسن محمد دويدار، وأحمد أحمد عثمان، وسكرتارية أحمد الميداني.
إحالة المتهمين للجنايات
كان المستشار سعود محمد نجيب، المحام العام لنيابة كفر الشيخ الكلية، قد أحال كل من 'م. ا.ه.أ'،
27 عامًا، مقيم بمنطقة ضهر المشروع بمركز مطوبس، و'ن.م.أ.ح'، 25 عامًا، بائعة أسماك، مقيمة قرية سكرانة التابعة لذات المركز إلي محكمة جنايات فوه؛ لإجراء محاكمتهما عما نُسب إليهما من اتهام؛ لأنهما في يوم 17 نوفمبر 2022 بدائرة مركز شرطة مطوبس قتلا المجني عليه 'ن .ا.هـ. أ'، شقيق المتهم الأول، وزوج المتهمة الثانية، عمدًا مع سبق الإصرار والترصد.
وكشف أمر الإحالة أن المتهمين بيتا النية وعقدا العزم المصمم عليه فأعد المتهم الأول لذلك الغرض أداة 'كوريك'، واستدرجته المتهمة الثانية إلى أرضه الزراعية بعلم من المتهم الأول، وبناء على مطلبه لإتمام مخططهما الإجرامي، وما استقرا بمحل الواقعة حضر المتهم الأول وما أن شاهده حتى انهال عليه ضربًا.
وكشفت أوراق القضية أن المتهم الأول كال لشقيقه عدة ضربات برأسه مستخدمًا في ذلك أداة أخري 'قالب طوب'، محدثًا إصابته الموصوفة بتقرير الصفة التشريحية والتي أودت بحياته قاصدين بذلك قتله.
كما تبين من أمر إحالة المتهمين لمحكمة جنايات فوه إحراز المتهم الأول وحيازة المتهمة الثانية أداتين 'كوريك وقالب طوب'، تستخدما في الاعتداء على الأشخاص، واستخدمهما المتهم الأول في جريمته المتفق عليها مع المتهمة الثانية محل الاتهام السابق.
تابعوا آخر أهل مصر على Google News
