تواصل «أهل مصر» نشر نص التحقيقات التي تنفرد بنشرها والتي أدلى بها الجزار المتهم بقتل «متسول كفر الشيخ» المعاق ذهنيًا لسرقة أمواله في قرية منية المرشد بمركز مطوبس، والذي أدلى باعترافات تفصيلية أمام جهات التحقيق في محافظة كفر الشيخ.
وقال المتهم في اعترافاته، إنه تتبع المجني عليه إلى منزله وهو ملثم؛ لأنه يعلم أن الشارع به كاميرات، وبعد دخول المجني عليه إلى المنزل، انتظر لمدة دقيقة ثم تبعه، وأوضح المتهم في اعترافاته أن الباب كان مفتوحًا، وليس هناك أحد، ثم صعد خلفه إلى الطابق الأول الذي يقيم به، حيث كان السلم ظلامًا، وأضاء كشاف الهاتف الذي معه، ثم دخل معه إلى غرفته، وكانت ظلام، حيث أضاء المجنى عليه الأنوار بها.
صورة تعبيرية
الأوضة كانت كلها قمامة
وتابع المتهم في اعترافاته: «الأوضة كانت كلها قمامة، ولقيت فيها ثلاجة وفتحت الباب بتاعها لقيته اتكسر وطلع في إيدي، وقولت له أنت معندكش أكل ولا إيه وقفلت التلاجة ثاني وطلعت بره الصالة أبص على التلفزيون لقيته الضهر بتاعه مخلوع وأنا كنت عايز أشتري التلفزيون علشان أسمع عليه الماتشات وقعدت أقول له إيه ده هعمل بيه إيه وبعدين قلت مش مشكلة أخده وطلعت من جيبي فلوس بعدها لقيتها 950 جنيه وهو أخدهم وبعدين قولت له دول 950 جنيه مش 500 جنيه، لقيته قعد يتكلم كلام مش مفهوم، وقولت خلاص مش مهم أسيب له 450 جنيه لله، وقعدت أبص في الشقة لاقيتها مليانة قمامة وحاجات مرمية في كل حته، وأقلب يمين وشمال وأبص على التلفزيون وبعدها النور تقريبًا فصل أو قطع مش عارف والدنيا بقت ضلمه مش شايف أي حاجة».
ركنت الكيسة اللي فيها العصاية
وأكمل: «أنا وقتها كنت ركنت الكيسة اللي فيها العصاية على جنب وبنور النور بتاع التليفون بتاعي وهو وقتها قعد يزعق وبصوت وحسيته واقف في ضهري لازق فيا وخفت ألا يقتلني أو يعمل فيا حاجه ورحت مطلع من جيبي السكينة اللي كانت معايا وقعدت أضرب فيه وهو ورايا بايدي الشمال بالسكينة وهو كان بيصوت بالكلام بتاعه الغير مفهوم ده وضربته كذا ضربه بس الدنيا كانت ضلمه ومكنتش عارف الضرب جه فين ومش عارف هو واقف في ضهري ولا وشي ومكنتش شايفه خالص وساعتها مكنش ليه صوت وأنا وقتها خفت وقعدات أنط على السلالم وأجري وحطيت السكينة في جيبي ونزلت طلعت من البيت وكنت وقتها لسه لابس الشال والكمامة ومشيت في نفس السكة اللي جيت منها بس كنت ماشي بخطوة سريعة ورجعت من نفس السكة الضلمة اللي كنت ماشي وراه فيها وأنا في السكة لما بعدت عن قرية منية المرشد قلعت الكمامة رمتها وحطيت الشال في جيبي وروحت على البيت قلعت الجلابية اللي كنت لابسها ونمت وكنت حاسس إن أنا في حلم وصحيت الصبح لبست جلابيه تانية وأخدت السكينه بتاعتي ونزلت محل الجزارة بتاعي قعدت فيه وبعد الضهر لاقيت الحكومة جت وقالوا لي الكاميرات كانت جايبة صورتك وأنت داخل البيت بتاع مصطفي بالراحه، قولت لهم أيوه وقولت لهم على اللي حصل، وركبت معاهم البوكس وروحت المركز، وده كل اللي حصل».
إحالة المتهم للمفتي
وقضت محكمة جنايات فوه، الدائرة الثانية، حضوريًا، وبإجماع آرائها، بإحالة أوراق جزار خمسيني، متهم بقتل شاب من ذوي الهمم طعنًا بسلاح أبيض؛ على إثر مروره بضائقة مالية، ووجود خلافات مالية بينهما لرفض المتهم رد المبالغ المالية التي استدانها من المجني عليه، لفضيلة المفتي؛ لأخذ الرأي الشرعي في عقوبة إعدامه.
صدر الحكم برئاسة المستشار جمال زكي طوسون، رئيس المحكمة والدائرة، وعضوية المستشارين محمود أحمد الغايش، ومحمد ناصر بلبع، وسكرتارية أحمد الميداني، وذلك في أحداث القضية رقم 17312 لسنة جنح مركز مطوبس، والمقيدة برقم 3056 لسنة 2023 كلي كفر الشيخ.
إحالة المتهم للمحاكمة
كان المحام العام لنيابة كفر الشيخ الكلية، قد أحال «أ.ع.ع.ع 59 عامًا»، جزار، مقيم قرية إبيانة التابعة لمركز مطوبس بمحافظة كفر الشيخ، لمحكمة الجنايات؛ لمحاكمته عما نُسب إليه من اتهام.
وتبين من أمر إحالة المتهم لمحكمة جنايات فوه، أنه في يوم 22 يوليو 2023 بدائرة مركز مطوبس بمحافظة كفر الشيخ، قتل عمدًا المجني عليه 'مصطفي محمد خضر قشلان' مع سبق الإصرار بأن بيت النية وعقد العزم على إزهاق روحه وذلك بغية سرقته وأعد سلاح أبيض (خنصر) محل الاتهام اللاحق وتتبعه ملثمًا إلى حيث مسكنه وما أن ظفر به حتى سدد له عدة طعنات بسلاحه الأبيض حوزته بأماكن متباينة بجسده قاصدًا من ذلك قتله فأحدث به الإصابات المبينة بتقرير الصفة التشريحية المرفق بالأوراق والتي أودت بحياته على النحو المبين بالتحقيقات.
وتبين من أمر الإحالة أنه قد ارتطبت تلك الجناية بجنحة أخرى وكان القصد من ارتكاب تلك الجناية التأهب لفعل الجنحة وتسهيل ارتكابها، ذلك أنه في ذات الزمان والمكان آنفي البيان شرع في سرقة المبالغ المالية المملوكة للمجني عليه المتوفي إلى رحمة مولاه، إلا أن أثر جريمته قد خاب لسبب لا دخل لإرادته فيه وهي استغاثة المجني عليه حال طعنه ففر هاربًا، ولم يتم جريمته، وهو الأمر المؤثم والمعاقب عليه بمواد قانون العقوبات على النحو المبين بالتحقيقات.
كما أحرز سلاح أبيض (خنصر) بدون مسوغ من الضرورة المهنية والحرفية وتستخدم في الاعتداء على الأشخاص على النحو المبين بالتحقيقات.
تابعوا آخر أهل مصر على Google News
