الحاجة وهيبة في الشارع من 36 سنة: بنتي توفيت ومليش غير ربنا

في أحد أحياء الفيوم، وبالتحديد في منطقة الصوفي، التقت كاميرا "أهل مصر" بالحاجة وهيبة محمد عبد العال، التي تبلغ من العمر 86 عامًا. ليس لديها من يعولها، وتجلس في الشارع تجمع الصدقات كل يوم منذ أكثر من 30 عامًا على هذا الحال.

استهلت الحاجة وهيبة حديثها قائلة: "كان عندي مطعم أنا وأبويا، ولما توفى عشت أنا وبنتي الوحيدة. ولما بنتي توفت من 36 سنة، عشت مع بنت أختي التي يعاني زوجها من الشلل، وهي تقوم بإعالته أيضًا. وكل يوم أخرج من بيتي على الله علشان أجيب أكل."

وتابعت: "لا عندي معاش ولا حتى تموين، وعايشين على الفول والجبنة كل يوم. نفسي أشتري حاجة مش عارفة، ومفيش أي جمعية خيرية ساعدتني. أنا مش بقدر أتحرك، لكن بنزل غصب عني عشان أجيب لقمة عيش نأكلها."

وأضافت الحاجة وهيبة: "أهل الخير والجيران كانوا بيساعدوني، لكن لما الأسعار زادت، مفيش حد بقى يديني حاجة. حتى زوج بنت أختي المريض مالوش معاش، وزوجته هي اللي بتجري عليه عن طريق عمل طعام بالمنزل وبيعه."

وتابعت: "أنا بصوم طول اليوم، مش باكل غير لما أروح البيت بعد صلاة العشاء، وبفطر على فول وجبنة." ثم قالت ودموعها على خديها: "نفسي أشتري بيضة مش عارفة، نفسي آكل عدس مش معايا أشتري. نفسي حد يساعدني ويوفر لي معاش أقدر آكل منه، ومنزلش أتبهدل في الشارع. الشتاء داخل ومش عندي لبس."