حرص الإعلامي باسم يوسف على الدفاع عن محمد صلاح، مهاجم الفريق الأول لكرة القدم بنادي ليفربول الإنجليزي، بعد هجوم الجماهير ضده عقب نشره فيديو الدعم لأهالي غزة.
وكتب باسم يوسف، عبر حسابه الرسمي على موقع التواصل الاجتماعي «فيس بوك»: «أنا شفت الصورة دي في كذا صفحة مع تعليق.. محمد صلاح متصور مع فخر العرب.. ده غير بوستات تانية كتيرة جدا يا اما بتقارن لقائي مع الفيديو بتاعه أو بتقلل و تهمش و تتريق على فيديو صلاح».
يوسف: لعيب الكرة ملوش علاقة بالسياسة
وأضاف: طيب كذا نقطة: المفروض في عالم طبيعي إن لعيب الكورة أو حتى الكوميديان يكونوا في الصفوف الاولى للدفاع عن القضايا الإنسانية.. ده دور الإعلام.. والسبب ان اللي بيحصل غير كده إن الإعلام بيفشل في ده بل و بيزيد الامور سوءًا فتتجه الناس للأشخاص الناجحين في مجالهم عشان يغطوا على فشل في مجال مش بتاعهم و ده أول السكة في اننا بنظلمهم معانا».
وتابع: «صلاح لعيب كورة.. لا يتدخل في السياسة من أول يوم.. ولا احتفاله بالكريسماس مش رسالة سياسية.. الاحتفال بأي مناسبة ده نشاط إنساني بحت ولا يجب مقارنة صورة جنب شجرة كريسماس أو حلويات المولد بوضع علم أو رمز للتضامن».
وواصل: «تعزيته في موت ملكة إنجلترا هو أيضًا فعل إنساني، وليس سياسي.. صلاح أو أي لاعب كرة لو كان بيلعب في دوريات الخليج ولا قدر الله لو أمير أو ملك أو شيخ أو حاكم الدولة أو الإمارة أو المحافظة اللي فريقه بيلعب له توفاه الله كان حيكتب تعزية برضة لأن ملكة انجلترا عند الإنجليز اللي بيلعب عندهم مكانتها في قلوب ناس كتير جدا زي مكانة هذا الملك او الامير في قلب شعبه. فده بروتوكول وليس فعل سياسي».
وأكمل: «مقارنة فيديو صلاح باللقاء بتاعي هو ظلم بين. لأن الكلام مش شغلة صلاح.. ولأن طلاقة اللغة مش شغلة صلاح.. لا صلاح حيعرف يتكلم ويحاور زيي ولا انا اقدر العب كورة زي صلاح.. يا جدعان ده انا اكبر انجازاتي الكروية اني عملت تلات عمليات غضروف وأنا عندي ركبتين اتنين بس! ده أنا خدت كباري بعدد شعر راسي.. ولو على اللغة، صلاح اللي ما دخلش مدارس لغات زيي بيتكلم إيطالي. انا معرفش كلمتين إيطالي على بعض».
وأردف: «صلاح بالانجليزي المكسر والأداء الفلات أو المخطوف زي ما ناس وصفته، الأداء الوحش ده عمل ملايين التفاعلات و المشاهدات.. كونه بقى إن الكلام مايع ، مافيش ادانة واضحة، مسك العصاية من النص.. قصف الجبهات مش دور صلاح خالص.. ولأصلا هو فيديو غير موجه لينا. ورب فيديو بسيط من غير عياط ومن غير نرفزة ومن غير شتيمة ومن غير إدانات وشجب وعياط ودموع لكن يوصل برة و يغير صوت واحد ده ابرك بكتير».
واستطرد: «واحد زي صلاح، ملهم لأجيال كتيرة قصة كفاح غير مسبوقة، راجل بيتبرع في السر اكتر من العلن، فاتح بيوت انا و انتم مش عارفين عددها، واحد زي ده نخسره ليه؟ عشان ما شفاش غليلك في قضية بقالها ييجي ميت سنة اعتى الانظمة و اكبر الدول فشلوا فيها؟ أتأخر؟ ياسيدي المهم انه وصل. مش قوي بما فيه الكفاية؟ اه بالنسبة لك ، لكن بالنسبة لناس كتيرة قوي قوي قوي دي ممكن يكون اول مرة يسمعوا فيها عن القضية. الدنيا برة غير خالص الوطن العربي عندنا بس ده له بوست لوحده».
وزاد: «فاكرين لما صلاح نزل صورته في القدس و كتب تضامن؟ اتشتم برضة. طيب لما يبقى عندنا واحد بوزن صلاح وكل شوية نشتمه عشان ماعملش اللي احنا عشمانين فيه، طيب على الاقل لو ما شجعناش صلاح مش لازم ندوس عليه. صلاح مش المفروض يكون هو هدف لغضبك».
وذكر: «أنا مريت بالفترة دي: ساكت ليه، ما تعمل زي فلان ما تقول زي علان؟ كل واحد و ظروفه و حساباته . لا يكلف الله نفسا الا وسعها. كل واحد ادرى بالضغوط اللي عليه. بلاش نكون احنا كمان سبب زيادة في الضغط عليه».
واختتم: «في الاخر كل واحد و رأيه. كل واحد يحب و يكره اللي هو عايزه. لو حبيت صلاح او كرهته انت حر، البوست ده مش حيغير حاجة. و دي صورتي مع فخر العرب، محمد صلاح».
تابعوا آخر أهل مصر على Google News
