نعى عصام صبحي، لاعب النادي الإسماعيلي، وفاة مدربه إيهاب جلال والذي وافته المنية أمس الأربعاء، بعد إصابته بجلطة في المخ.
وكتب عصام صبحي عبر حسابه الشخصي على 'فيسبوك':'( قُلْ كُلٌّ يَعْمَلُ عَلَىٰ شَاكِلَتِهِۦ فَرَبُّكُمْ أَعْلَمُ بِمَنْ هُوَ أَهْدَىٰ سَبِيلًا).
وأضاف: 'زمان أنت اللي فسرتلي معنى الآيه دي ووقفت معايا تشرحلي وقولتلي أتعامل بيها في حياتي، وأنا أشهد الله أن أنت مافيش حد على شاكلتك أنت من احترام وأدب وإنسانية'.
وأكمل: 'أنت النهاردة سيبتنا وروحت لمكان أحسن بس سيرتك الطيبة وحب الناس ليك وكلامهم عنك خلوني أتأكدت أن ربنا راضي عنك'.
وواصل: 'كان نفسي تشوف بعينك لما تعبت حب الناس ليك قد ايه وخوفهم عليك ودعائهم ليك بالشفاء قد أيه يمكن ده كان يخفف عليك شوية من الحزن والتعب اللي شوفتهم آخر فترة'.
واستكمل: 'النهاردة أنت فارقت الحياه بس عايش جوة كل واحد بيحبك عايش بسيرتك وبمواقفك وبعملك الخير، النهارده بشوف بعيني حب الناس ليك وحزنهم على وفاتك والله والله والله اتمنيت لما يجي يوم وفاتي تكون ساعتها سيرتي زي سيرتك يا أحسن الناس.
واستطرد: 'بعد وفاة أبويا الله يرحمه أنا قولت مافيش حاجه في الدنيا هازعل عليها قد وفاة أبويا، بس أنا الوحيد اللي أبوه مات مرتين علشان أنا عمري ما اعتبرتك غير أب ليا وزعلي عليك وكسرة قلبي عليك ما تتوصفش'.
واختتم: 'مع السلامة يا راجل يا محترم، مع السلامة يا راجل يا طيب، مع السلامة يا راجل يا جدع، مع السلامة يا أبويا، ولا نقول إلا ما يرضي ربنا (إنا لله وإنا إليه راجعون).
تابعوا آخر أهل مصر على Google News
