"هند" تطلب الخلع: "بيقولي اعملي رجيم عشان أوفر في الأكل "

"جوزي بيبص في اللقمة اللي باكلها على الرغم إنى بشتغل وبشارك فى مصاريف البيت، ولو اشتريت حاجة لنفسي من فلوسي يقول لي إنتي مسرفه ومش بتعرفي تشيلي قرش، لدرجة إنه دلوقتي كل ما يشوفي باكل حاجة يفضل يقول لي خسي شوية وبطلي أكل وفري شوية اعملى ريجيم"، جاءت هذه الكلمات على لسان هند وهي داخل محكمة الأسرة لرفع دعوى خلع من زوجها بعد 3 سنوات من الزواج.

وروت الزوجة "هند"، قصتها لـ "أهل مصر" قائلة: "لما اتجوزنا كنت بشتغل فى شركة، ولما فكرت انى ابطل شغل هو رفض وأقنعني إني أكمل شغل، عشان نساعد بعض، وأنا وافقت عشان أشترى كل اللى نفسي فيه، وكنت بشتغل وأشارك معاه فى مصروف البيت، ومكنتش بعترض لكن هو اللى كان بيعترض لو اشتريت حاجة لنفسي، عايز اصرف على البيت والباقي ياخده هو يشيله معاه لكن انا مش من حقي أشترى اى حاجة ليا لدرجة انه بقي يبص على اكلى على الرغم انى اتأخرت فى الحمل وكنت بكشف وبتابع عند دكتور من فلوسي".

وتابعت حديثها قائلة: "لحد ما يضايقنى بكلامه لو شافنى باكل يقول لي كفاية أكل وفرى شوية واعملى رجيم على أساس إنه هو اللى بيأكلني لحد ما بقيت أكره أكل أو أشترى حاجة من كلامه وقررت إنى انفصل عنه وطلبت منه الطلاق لكن رفض عشان كدا رفعت دعوى خلع بمحكمة الأسرة وانتظر أولى الجلسات".