مروة تطلب الخلع: "بيقول لى ادلعى على صاحبي وخدى منه فلوس من غير ما يلمسك"

"كنت فاكرة انه اتجوزنى عشان نبنى بيت وأسرة مستقرة لكن اتفاجئت انه متجوزنى عشان اجيب له فلوس وكمان يستغل جمالى عشان أضحك على الرجالة، والغريبة انه عامل نفسه عنده رجولة ونخوة وبييقول لى إياكى تخلى حد يلمسك آخرك كلام".. جاءت هذه الكلمات على لسان "مروة" وهى داخل محكمة الأسرة لرفع دعوى خلع من زوجها بعد 11 شهرا من الزواج مبررة استحالة العشرة معه.

وروت الزوجة قصتها لـ"أهل مصر" قائلة: اتجوزت من 11 شهر بعد علاقة عاطفية استمرت 5 شهور وعلى الرغم ان الكل فى العيلة قالى بلاش وشكله مش مريح، لكن مراية الحب عمياء وكنت مصدقة انه بيحبنى وهيصونى، عشان كدا ساعدته فى مصاريف الجواز من وراء أهلى، وكبرته قصادهم، لحد ما اتجوزنا وبدأ يطلب فلوس كتير لحد ما تقريبا بعت الدهب وفلوس كانت فى الفيزا معايا خلصت وكل دا من وراء أهلى، لحد ما فلست خالص ولقيت أصحابه كتروا من السهر فى شقتنا وكنت أطلع أحضر لهم أكل ومشروبات لكن نظراتهم مش مريحة ليا، ولا لجسمى وقررت أقول لجوزى عشان يبطل يجيبهم الشقة.

وتابعت حديثها قائلة: كنت فاكرة انه راجل ويغير عليا لكن اتفاجئت لقيته بيقنعنى انى ممكن أعرف أجيب فلوس من أصحابه عن طريق الهزار والدلع لكن محدش يلمسنى، عشان نعرف نصرف لأنه مش لاقى شغل، كانت صدمة ليا ازاى يقول لى كدا وأنا استحالة أغلط دا أنا رفضت انه يمسك إيدى قبل الجواز، وطلبت منه الطلاق ورفض، عشان كدا رفعت دعوى خلع بمحكمة الأسرة، وأنتظر أولى الجلسات.