شيرين تطلب الخلع: فاكرني مقضياها مع الرجالة

"بشتغل من أول ما اتجوزت عشان أساعده في مصاريف البيت والمعيشة، خاصة أنه مرتبه قليل، مش بيبقض غير ألف ونص وإحنا عندنا إيجار وأقساط، وربنا يعلم بحترمه وبعمل حسابه في كل تصرفاتي في غيابه قبل حضوره، لكن هو رد المعروف بالشك بيتمهني أني ست مش كويسة وبخونه ومقضياها فى الشغل مع الرجالة، لدرجة أنه شك فيا أنا وأخوه"، جاءت هذه الكلمات على لسان "شيرين" وهي داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.

وروت الزوجة قصتها لـ"أهل مصر"، قائلة: "من أول ما اتخطبت ليه وأنا اتفقت معاه أننا نساعد بعض ونشتغل ونكون مستقبل كويس لينا ولأولادنا في المستقبل، وعجبه جدا الاتفاق وفعلا لما اتجوزنا نزلت شغل سكرتارية في شركة خاصة، ومرتبي كان أعلى منه بكتير جدا، وبقيت أشتغل بكل جهدي عشان أثبت نفسي وأعرف أكون سند جوزي، لكن بعد مرور أشهر حالة تغير، والشك زاد ويفتش في تليفوني ويحاسبني بالدقيقة على مواعيد الشغل".

وتابعت حديثها: "كنت بتأقلم عشان أمشي أموري وأقول إن ربنا هيهديه ويعرف قيمتي، لكن الشك زاد لدرجة أنه بقى مريض بالشك أن بخونه رغم أن الجميع يشهد بأخلاقي حتى أهله، لكن هو بدأ يتطاول عليا بالكلام ويتهمني بأني برسم على أخوه الصغير عشان أعمل علاقة معه، وأول ما سمعت كدا اتجننت، وقررت أسيب البيت على طول، وطلبت الطلاق ورفض فرفعت عليه دعوى خلع ومازالت الدعوى منظورة أمام القضاء".