"إنسان مريض أى حاجة تحصله في حياته أو يتعب أو فلوس تضيع منه يقول إنى عامله له سحر، عشان كدا الدنيا مقفلة معاه، وكمان كل ما يقرر يطلقنى مش بيقدر، وهو وأمه كل يوم في نفس الحوارات معايا عشان كدا رفعت عليه دعوى خلع، عشان أثبتهم إنى مش عايزها، وإني مش بعمل سحر عشان أفضل معاه".
بهذه الكلمات نطقت "ندى"، وهى داخل محكمة الأسرة بزنانيري لرفع دعوى خلع من زوجها؛ بعد عامين فقط من الزواج، مبررة بذلك استحالة العشرة معه.
وقالت الزوجة فى مستهل حديثها لـ"أهل مصر": "اتجوزت من سنتين جواز صالونات، هو شافنى في فرح وتقدم ليا، زي أي بنت أنا شوفته مناسب ليا وافقت، واشترط إننا هنعيش مع والدته في البيت عشان متقعدش لوحدها، ووافقت وقررت إني هعتبرها أمي، واتخطبنا ٤ شهور فقط، وهو اللى استعجل عشان نتجوز، وأنه مش قادر يعيش من غيرى، واتجوزنا وبعد كام يوم من الجواز اكتشفت إني جوزي وحماتي دماغهم غريبة طول الوقت بيفكروا فى الحسد والسحر، ومتهيألهم إنى كل الناس بتسحرهم، حتى أنا بقوا فى أول الجواز يلمحوا من بعيد وكنت بقول لنفسي استحالة يكونوا بيقصدوا كدا، لحد ما قالها فى وشي إنى بسحر ليهم وخاصة جوزى بقي يقول "أنا عايز أطلقك ومش قادر عشان انتى عامله سحر مسيطرة بيه عليا".
وتابعت حديثها قائلة: "كنت هتجنن وسطهم ومن الكلام والتفكير الغريب اللى فيه وأيقنت إنهم ناس مش طبيعين دول أكيد مرضي نفسيين، ولازم يتعالجوا أنا طفح بي الكيل من تصرفاتهم عشان كدا قررت أخلعه عشان يعرف إنى لو عايزه مش هخلعه، وفعلا قررت ورفعت دعوى خلع ومازالت الدعوى منظورة أمام القضاء".
تابعوا آخر أهل مصر على Google News
