"عمرى ما كنت أتخيل ان ييجي عليا أنا وأمى يوم ونبقي بالمنظر دا وحماتى بتضربنى بالشبشب على دماغنا وسط الشارع وتتهمنا انى بعمل سحر لجوزى عشان يمشي على مزاجى، وربنا يعلم انها كذابة وهى اللى نكدت عليا حياتى وعيشتى كلها من أول ما اتجوزنا عشان ابنها اتجوزنى وهى كانت عايزة تجوزه واحدة قريبتها، طيب أنا ذنبي إيه ووالدتى مريضة القلب اللى حالتها النفسية صعبة جدا بعد اللى حصل ومش قادرة تشوف حد".. جاءت هذه الكلمات على لسان منال وهى داخل محكمة الأسرة لرفع دعوى خلع من زوجها بعد عام وشهرين فقط من الزواج مبررة استحالة العشرة معه.
وقالت الزوجة في مستهل حديثها لـ"أهل مصر": أنا اتجوزت من سنة وشهرين جواز صالونات من شاب بيشتغل فى شركة ومكنش مصارحنى فى البداية ان أمه رافضة جوازنا، لحد ما كتبنا الكتاب، وحسيت بكرهها ليا ومعاملتها السيئة معايا، لكن اتحملت على أمل انها تغير من معاملتها ليا بعد الجواز، لكن لقيتها زى ما هى بل أسوأ، وبتتدخل فى كل خصوصياتنا، وجوزى طول اليوم فى الشغل بيرجع مش بيحب يسمع أى حاجة من مشاكلنا، وأنا كنت عايشة فى بيت عيلة معاها، ورضيت بنصيبي، وبحاول أقتصرها على قد ما أقدر، حتى والدتى كانت بتتجنب تيجى عندى وأنا اللى بروح أزورها عشان متدخلش فى خلافات مع حماتى، لحد ما تعبت فى يوم ووالدتى جات عندى تقعد معايا يومين، وحماتى شافت اهتمام جوزى بأمى واتجننت.
وتابعت حديثها: حماتي انتظرت ان جوزى ينزل الشغل وبدأت فى الشتيمة قدام أمى، وانى مش محترمة ولا أعرف أخلاق، وكل دا وأنا ساكته لكن والدتى مستحملتش وردت عليها ومسكوا فى بعض والجيران اتدخلوا، وحماتى رفعت عليا أنا وأمى الشبشب وضربتنا قدام الجيران لحد ما الناس طلعونا من إيدها ووالدتى مريضة قلب، مستحملتش وأخدتنى ومشينا على بيت أهلى، وجه جوزى عشان يعتذر ويفهم اللى حصل لكن والدى أصر على الانفصال وجوزى رفض يطلقنى، فرفعت عليه دعوى خلع، ومازالت الدعوى منظورة أمام القضاء.
تابعوا آخر أهل مصر على Google News
