لم تتخيل أمل صاحبة الـ 26 عاما أن زوجها يتجرأ على إحضار أصحاب السوء إلى شقة الزوجية؛ لتناول الحشيش وتعاطى المخدرات، وأحيانا يصل الأمر إلى مشاهدة الأفلام الإباحية؛ مما جعلها تدخل فى شجار دائم معه لمنع أصدقاءه من المجيء إلى شقتهم.
وقالت "أمل"، إن الشجار اشتد بينهما ما دفعه إلى التعدي عليها بالضرب محدثا لها إصابة في الرأس، مما جعلها تقف داخل محكمة الأسرة لرفع دعوى خلع من زوجها بعد عام ونصف من الزواج.
وأضافت الزوجة في مستهل حديثها مع "أهل مصر": "متجوزة من سنة ونصف جواز صالونات، ووالدى متوفي وماليش غير أخ أصغر مني بكتير، وباقي اخواتي بنات، وعشان كدا حبيت أخف الحمل على أمي شوية واتجوز وللأسف عرف يخدعنى بإنه مش بيشرب وبيشتغل ورزقه كويس، لكن كل دا طلع كذب بعد الجواز اكتشفت إنه بيشرب حشيش وكل فلوس شغله رايحه على السهر والمخدرات مع أصحاب السوء اللى يعرفهم".
وتابعت حديثها قائلة: "كنت بحس بالحسرة من كتر الشرب، واللى زاد الطين بله إنه بقي يجيب أصحابه فى شقتنا ويشربوا ويسهروا، حتى الأفلام الإباحية بيتفرجوا عليها فى الشقة ،ولما اتكلم معاه وأقوله إن دا ميصحش وكدا غلط يقول لي: "انتى مالك اقفلى بابا أوضتك ومالكيش دعوة"، وبقى حالنا كل يوم خناقة، لحد ما طفح بي الكيل واتخاقنا خناقة كبيرة لدرجة إنه ضربنى ووقعت على دماغي واتفتحت وأخدت غرز".
وأكملت: "رفضت أعمل تقرير طبي عشان المشاكل وخايفة على أخويا، وطلبت إنه يطلقنى لكن هو رفض وصمم يسبنى معلقة عشان كدا مالقتش حل قدامى غير رفع دعوى خلع، ومازالت الدعوى منظورة أمام القضاء".
تابعوا آخر أهل مصر على Google News
