إيناس فى دعوى خلع: بيكلم بنات في الحمام.. وضربني لما فضحته

'كنت ديما بحس بيه بالليل يقوم من على السرير ويدخل الحمام ومعاه التليفون واسمعه بيتكلم مع حد بصوت هادى جدا لدرجة انى معرفش اجمع الكلام اللى بيقوله جمل، ولما اساله يكذبنى ويقول إنه مش بيكلم حد، لحد ما ربنا كشف ستره وسمعت فى مرة ولقيته بيتكلم مع بنت اتعرف عليها على الانترنت وبيدخل الحمام عشان مسمعش ولما واجهته قدام أهله اتفاجت أنه بيضربنى وبيقول انى كذابة'.. جاءت هذه الكلمات على لسان إيناس وهى داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه.

رفع دعوى خلع

وقالت الزوجة في مستهل حديثها مع 'أهل مصر': 'اتجوزت من سنة ونص زواج صالونات، هو بيشتغل فى شركة قطاع خاص، وانا بشتغل فى مدرسة وكنت بساعد معاه فى مصاريف البيت من اول ما اتجوزنا وعمرى ما طلبت منه شئ، كان كل املى انى اعيش حياة طبيعية ومستقرة، بس اكتر شئ بكره فى حياتى الخيانة عشان كدا من اول الجواز وانا بشك فى تصرفاته، ديما قاعد على الفيس بوك باسورد التليفون على طول مغيرة، حياته كلها غموض'.

محكمة الأسرة

وتابعت: 'كان ديما يدخل الحمام فى نص الليل بعد ما بحس انى نايمة ومش هحس لكن كنت بحس بيه ويسمع صوت همسات من الحمام وكان بيقفل على نفسه، لكن صوته بيبقي ضعيف مش بسمع كويس واتحملت وكنت المح الصبح انى سمعت صوته لكن يكذبنى لحد ما فى مرة سمعته بيتكلم مع بنت كلام إباحى ووجهته قدام أهله فاتفاجت بدل ما يعتذر تعدى عليا بالضرب وإهانى قدام الكل ولما طلبت الطلاق قالى هسيبك معلقة فرفعت دعوى خلع ومازالت الدعوى منظورة أمام القضاء'.