تامر أمين يهاجم مرتضى منصور: "عارف إني هطلع على المسرح بس الكيل طفح"

شن الإعلامي تامر أمين، مقدم برنامج 'آخر النهار'، هجوما حادا على رئيس نادي الزمالك مرتضى منصور.

وقال تامر أمين، خلال تقديم برنامجه الذي يعرض عبر قناة 'النهار'، أمس الأربعاء: 'إمبارح فوجئنا بوفد من نادي الزمالك برئاسة مرتضى منصور ومجموعة من أعضاء مجلس الإدارة، ومجموعة من ناس مش معروفة، ومعاهم مجموعة من أمن نادي الزمالك، كل دول هجموا على اتحاد الكرة عشان يقيدوا صفقات نادي الزمالك الشتوية'.

تامر أمين مهاجما مرتضى منصور: حرام يكون ده مجلس الإدارة اللي بيمثل الزمالك

وأضاف تامر أمين: 'فترة القيد الشتوي تبدأ من 1 يناير إلى 31 يناير، شهر طويل عريض، نادي الزمالك سايب الشهر كله ورايح قبل غلق باب القيد بربع ساعة وعايز يقيد صفقاته دلوقتي'.

وتابع 'أمين': 'الزمالك عليه مديونية، واللائحة بتقول إنه لازم يدفعها أو جزء منها عشان يقيد لاعبيه، الزمالك رد وقال معييش فلوس دلوقتي بس قيد اللعبية، هو كده بلطجة'.

وأكمل تامر أمين: 'إيه اللي صبر مجلس إدارة الزمالك كل الوقت ده، وأنت عارف إن عليك مديونية لازم تدفع، ولا هو تلكيك عشان يحصل مشكلة وتحرج الرموز بتاعة الرياضة ورموز الدولة، شيء في منتهى الاستخفاف بالدولة ورموزها'.

وأوضح الإعلامي تامر أمين: 'مرتضى منصور طلع بعدها يعمل مسلسله السخيف على قناة الزمالك كل يوم. وجمهور الزمالك أكثر المستائين من مرتضى منصور، نادي الزمالك وكأنه عزبة، الزمالك نادي كبير أوي، حرام يبقى ده حاله وحرام يكون ده مجلس الإدارة اللي بيمثله'.

واختتم تامر أمين، حديثه قائلا: 'أنا عارف إني هطلع على المسرح النهارده بالليل، واتشتم أنا وأهلي، بس الكيل طفح'.