والد حلا شيحة: كلام بنتي مجاني وملهوش لازمة.. وإيه اللي دخل الدين في الفن؟ (خاص)

عبر الفنان التشكيلي أحمد شيحة، والد الفنانتان حلا وهنا شيحة، عن استيائه الشديد من الكلمات التي كتبتها ابنته حلا ضد الفنان تامر حسني، اعتراضًا على المشاهد التي استعان بها من فيلمهما 'مش أنا'، والذي يعرض حاليًا بدور العرض السينمائية، في كليب أغنيته الجديدة 'بحبك'، عبر صفحتها الشخصية بموقع تبادل الصور والفيديوهات 'إنستجرام'.

أحمد شيحة: أعترض على ما قالته حلا والفيلم لا يوجد به أي مشاهد خارجة

وقال أحمد شيحة، في تصريحات خاصة لـ'أهل مصر' إنه يتحدث الآن بصفته أحمد شيحة الفنان والأب في نفس الوقت، ويؤكد على أنه يعترض تمامًا عن كل ما كتبته حلا، مشيرًا إلى أن الفيلم لا يتضمن أي مشاهد خارجة عن اللياقة، وكل من شاهده يشكر فيه، والدليل على ذلك الإيرادات العالية التي حققها في السينمات.

والد حلا شيحة: طالما المشاهد مش عجباكي معترضتيش ليه

وأضاف 'شيحة' أن الفيلم لا يوجد به أي غلطة، ولذلك يتوجهه بالتهنأة للفنان تامر حسني، موجهًا لابنته: 'طالما انتي مش عجبك الفيلم أو المشاهد دي وشايفة إنها بتغضب ربنا صورتيها ليه.. معترضيش قبل التصوير ورفضتيها ليه'.

أحمد شيحة: بنتي ملهاش الحق إنها تتكلم وكلامها مجاني ملهوش لازمة

وأشار الفنان التشكيلي إلى أن ابنته حلا ليس لديها الحق لتخرج وتقول مثل هذا الكلام عن تامر حسني أو الفيلم، واصفًا كلامها، قائلًا: 'كلام مجاني وملهوش لازمة.. علشان أنا أبوها بقول ده مش حقيقة أو مش شخصيتها اللي نعرفها وبقول للناس إنهم يتمهلوا عليها شوية يمكن ترجع تاني'.

أحمد شيحة: إيه اللي دخل الدين في الفن

وأكد والد حلا شيحة على أنه لم يتواصل معها حتى الآن، ولكنه يقول لها بصفته والدها 'عيب كدا'، متوجهًا بالشكر للفنان تامر حسني، على حسن تصرفه ورده عليها، متابعًا: 'إيه اللي دخل الفن في الدين'.

حلا شيحة تهاجم تامر حسني

هاجمت الفنانة حلا شيحة في الساعات الأولى من صباح اليوم الخميس 15 يوليو، الفنان تامر حسني بعد طرحه لأغاني من فيلمه الجديد 'مش أنا'، والتي شاركته البطولة وظهرت خلال الأغاني وهي في أوضاع رومانسية مع تامر حسني.

رسالة حلا شيحة للفنان تامر حسني

كتبت حلا شيحة، عبر حسابها بموقع الصور والفيديوهات 'إنستجرام'، رسالة طويلة للفنان تامر حسني: 'انا اتفاجئت جدا ًبنزول كليب يجمع فيه مشاهد متفرقة من الفيلم و في أيام ذي الحجة ايام مباركة و خصوصاً بعد آخر بوست نزلته ووضحت فيه أنا ايه، تفاجأت أكتر خصوصًا بعد وعد تامر حسني ليا وتأكيده أنه يحترم رغبتي وبعض الطلبات اللي طلبتها منه بكل احترام وود الصيف اللي فات وأكد لي أنه هيحترم رغبتي'.

حلا شيحة: فتنة الشهرة والنجاح مش بتخلينا نشوف الأمور صح

وتابعت: 'احنا يمكن نجحنا بمقاييس الدنيا بس صدقوني بمقاييس ربنا احنا لم و لن ننجح، أنا عارفة ومتاكدة أن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح، بتكلم من قلبي الكليب ده ميرضيش ربنا وأنا عيطت لأني شفت نفسي في المشاهد دي.. دي كانت زلة نتيجة ظروف مريت بيها و كلنا بنغلط ولازم نغلط علشان احنا بشر بس المصيبة أننا نغفل وننسى'.

وأضافت: 'أنا مش حتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة أن ربنا يرضى عني لأن في الآخر ده اللي هينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص احنا أغلبنا ناسينها إلا القليلين منا، الفن لو بيخلينا نبعد عن منهج ربنا ومنبقاش قدوة لأولادنا يبقى باطل وميبقاش فن، احنا كلنا عندنا امتحان في الدنيا دي وحابة افكرك بالفيديو ده يا تامر اللي قولت فيه انا مش بتمنى اموت وأنا مطرب أنا دايما خايف من كده.. كلام أكيد قولته في لحظة صدق جواك وجوانا كلنا'.

واختتمت حلا شيحة حديثها للفنان تامر حسني، وكتبت: 'شوفه تاني يمكن يفكرك أن جواك أكيد في صراع وأنا وكلنا، كلنا بنغلط بس المهم في الآخر نتدارك الغلط ونصلح،{إِلَّا مَن تَابَ وَءَامَنَ وَعَمِلَ عَمَلا صَـٰلِحا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰت وَكَانَ ٱللَّهُ غَفُورا رَّحِیما}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد'.