سامح حسين: رفضت العمل مع الزعيم في مسلسل "فلانتينو"

كشف الفنان سامح حسين، عن أنه رفض العمل مع الزعيم عادل إمام في مسلسل فلانتينو.

وقال سامح حسين، خلال حواره مع الإعلامي عمرو الليثي في برنامج 'واحد من الناس' المذاع عبر قناة 'الحياة': 'أنا من عشاق الزعيم عادل إمام، وأكيد الشغل معاه إضافة لأي فنان، ولكن لما اتعرض عليا دور بمسلسل فلانتينو، الدور مجذبنيش كدور مهم أو مؤثر في الأحداث ورفضته'.

وأضاف سامح حسين: 'المشكلة مكنتش في مساحة الدور اللي اتعرض عليا في مسلسل فلانتينو، لكن لأنه الزعيم لازم تحس إنك هتبقى مؤثر في العمل وأنا محستش بـ دا، والفنان حمدي المرغني قبل الدور وقدمه حلو جدًا'.

سامح حسين: اشتغلت في البداية مساعد مخرج علشان آخذ فرصة

وتحدث سامح حسين، خلال اللقاء، عن بداياته في المجال الفني، موضحا: 'علشان آخد فرصة في التمثيل، اشتغلت مساعد مخرج كتير مع خالد جلال ووائل إحسان وسعيد حامد، وكان ممكن أطلع بجملة'.

وأضاف: 'في فيلم صاحب صاحبه اشتغلت مساعد مخرج، وعملت مشهد صغير مع محمد هنيدي، لكن في العرض الخاص اكتشفوا إن الفيلم طويل وقررا يسحبوا بعض النسخ ويعيدوا المونتاج'.

وتابع: 'بقى في نسخ من الفيلم معروضة في سينمات معينة وأنا موجود فيها، ونسخ في سينما أخرى أنا مش موجود فيها، لإن مشهدي كان ضمن المشاهد المحذوفة'.