لقاء سويدان: حسين فهمي «سي السيد» وكان بيغير عليا جدًا

تحدثت الفنانة لقاء سويدان عن طليقها الفنان حسين فهمي، خلال حلولها ضيفة على برنامج "ورا الشمس"، المذاع عبر قناة الشمس".

وقالت لقاء سويدان في حديثها عن حسين فهمي فترة زواجهما:"كان بيغير عليا أكتر بكتير جدا، حسين شرقي اوي، سي السيد، وانا كنت فاكرة أنه اتعلم برة مصر وبتاع، لكن رجل شرقي جدا، وبحب الراجل اللي متجوزاه يبقى غيور عليا وبيخاف عليا محبش الراجل اللي سايبني أعمل اللي عايزاه".

وتابعت لقاء سويدان:"حسين كان عنده قواعد ومواعيد للرجوع للبيت كمان، ومكنتش بقدر أخرج خالص من غيره، حصلت مرتين خرجت مع أصحابي فقط، وكان بيضايق اوي و بيغير، و كان عامل حاجة لطيفة مكناش بنخرج من غير بعض، كنا بنخرج سوا حتى السوبر ماركت كنا بنقي الخضار والفاكهة مع بعض، وسوا في كل حتة".

وكانت الفنانة لقاء سويدان كشفت في البرنامج عن بداية تعارفها بحسين فهمي قائلة:"فضل سنتين يحاول يتواصل معايا ويبين إعجابه وحبه وكنت بصده، وهو طلع بنفسه قال ده في حوارات صحفية، أنه قعد سنتين بيحاول يلفت نظري وأن يبقى فيه حاجة وأنا رافضة، وكنت رفاضة مش لأنه كبني آدم يترفض، لكن حسين فهمي معروف بقى أنه جان والستات كلها بتحبه وأنا مكنتش عايز أخش في علاقة فيها قلق أو مشاكل، أنا بحب حياتي الشخصية تبقى هادئة ومستقرة".

واضافت:"فالسبب الرئيسي أني كنت خايفة منه كبني ادم كنت فاكرة انه علاقات كتير وقلت طب ليه ادخل في حاجة وكنت منفصلة عن أبو بنتي، وقلت ليه ادخل في علاقة تانية فيها مشاكل تتعبني".

وتابعت:"قعدت سنتين خايفة أقرب منه خالص مع اننا كنا بنشتغل مع بعض مسرحية مهمة جدا هي "اهلا يا بكوات"، لمدة سنتنين، وبعدين اشتغلنا في مسرحية "زكي في الوزارة" و اتجوزنا قبل العرض بأسبوع، بعدين حسيت فيه بالاب اللي كنت مفتقداه، و طبعا أنا حبيته وحبيت حبه ليا واهتمامه بيا وخفة دمه وحجات كتير".

وعن أسباب الانفصال عن حسين فهمي قالت لقاء سويدان:"فارق السن بينا كان 34 سنة ومفكترش في فارق السن، وأنا من النوع اللي لما بحب بدلق وبأخد وقت طويل عشان أحب، لاني لما أحب دماغي بتقع مني".

وتابعت:" لما حبيته مفكرتش أن ممكن يحصل مشاكل في فرق السن بينا، ودي حاجة مهمة جدا والفارق بينا كان كبير مش قليل، وكان طبيعي يحصل اختلافات أساسها فرق السن".