"أوردراته كانت بتجيلي".. الفنان مصطفى درويش يروى تفاصيل أزمة تشابه الأسماء

كشف الفنان مصطفى درويش كواليس أزمته مع الراحل مصطفى درويش بسبب تشابه الأسماء، مشيرا إلى أن الأزمة بدأت مع عرض مسلسل 'العقرب' للمخرج نادر جلال، حيث فوجئ بوجود الاسم مرتين على التتر.

وقال مصطفى درويش خلال حواره مع الإعلامية إنجي هشام في برنامج 'المنسي' عبر قناة 'هي': 'المشكلة حصلت سنه ٢٠١٤، كنت بعمل مسلسل مع نادر جلال اسمه العقرب ولقيت نفسي مكتوب في التتر مرتين، كلمت المنتج قالي ده ممثل تاني اسمه مصطفى درويش'.

أزمة مصطفى درويش بسبب تشابه الأسماء

وأضاف: ' قلتلوا طب هو دا ينفع ده كده يبقي في اختلاط في الحكاية، وبعد فترة الناس بدأت تبعت لي أوردرات مش بتاعتي، ومرة روحت ٣ شركات أقول لهم باعتنلي ده ليه يقولولي معلش ده مش ليك أنت، وبعد فترة جالي من الضرائب إخطار بحاجات أنا معملتهاش فأقولهم يا جماعة معملتش الأعمال دي'.

تابع: 'في الآخر اشتكيت للنقابة والنقابة بعتت له ومضى إقرار يغير الاسم يخليه مصطفى حسين درويش، ومحصلش فاشتكيت تاني لأشرف زكي وجه مصطفى الله يرحمه بكل حب اتقابلنا وقال أنا آسف والأزمة اتحلت قبل ما يتوفى بسنتين'.

وختم درويش قائلا: 'الموضوع ده فرق معايا على مستوى الشغل مرة كلمت مخرج قالي واحشني قلت له طب مبتجبنيش ليه قالي أنا طلبتك وقالولي دا شغال في كذا، قلت له أنا قاعد في البيت فاتضح أن مصطفى كان بدأ ينتشر والناس افتكرتني أنا وبعدين أوردراته كانت بتجيلي'.