بهجت عدلي: «الفنان اللي بيقبل بأي دور بيرخص.. ومفيش حد بيشغل حد في الوسط»

كشف الفنان بهجت عدلي، سبب عدم استكمال مسيرته السينمائية، مؤكدًا أنه لا يمتلك واسطة في الوسط الفني.

وقال بهجت عدلي، في لقائه مع الإعلامية إنجي هشام، في برنامج 'المنسي' المذاع عبر شاشة قناة 'هي': إحنا في وسط صعب ومحدش بيطبطب عليكي ويقولك تعالي اشتغلي، أنتي بتنحتي في الصخر في كل حاجة لما بتاخدي الدور بتفكري بعد كده هعمل إيه، والموضوع مش سهل وبنعاني ونقاسي، وأنا بدايتي مكنتش ضيف شرف ولكن كانت أدوار بطولة، وفجأة بدأت أدواري تقل شوية علشان مكنتش بقول لأ، والشباب لازم يتعلم يقول لأ، مش أي شغل تقبله دي مصيبة وده اللي خلاني كده، كنت بتكسف أقول لأ، وأنا كنت بقبل أي حاجة وأي أدوار أقل من اللي كنت باخده قبل كده.

سبب عدم استكمال مسيرته السينمائية

وتابع: في بعض المخرجين اللي نفوسهم ضعيفة اللي ممكن تضايق وتقول أني برفض الأدوار ومبيقولوش أنهم مديني أدوار صغيرة، ولما الفنان بيقبل أنه يشتغل أي دور بيرخص.

وأضاف: الوسط بتاعنا وحش ومفيش حد بيشغل حد، والموضوع كله نفوس ويمكن دي طبيعة بشرية، يعني صحابي وأصدقائي وأكتر من إخوات ولكن مبيرشحوش حد، يعني كنت بقول أن شهر رمضان ده شهر البركة عليا وبشتغل فيه 3 مسلسلات، ومن 5 سنين مبشتغلش مسلسل في رمضان.

واستكمل: طلبت من نجمين كبار أني عايز أشتغل في رمضان السنة دي، وهما أبطال مسلسلات السنة دي، ومحدش جابلي حاجة، ومعرفش يمكن بيقولوا والمخرج بيقول لأ، أنا برضوا مش عايز أحط ضغط على البطل.

في أدوار كتير مناسبة ليا

في أدوار كتير مناسبة ليا، وأنا مؤمن أن ربنا عادل، وأن أنا لو ليا نصيب وشغل هشتغل، وأنا حاسس أني الحمد لله ربنا رازقني بحاجات تانية زي الأسرة والبيت الراحة النفسية، وبيحصلي كتير في مسلسل المخرج يقولي أنا مش مستريح ليك وبعدين هو يتخانق مع شركة الإنتاج ويمشي وأشتغل أنا في المسلسل.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساء، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.