أعرب الفنان عمر حسين عن سعادته البالغة بمشاركته في مسلسل 'ساعته وتاريخه، الذي تدور أحدثه حول تناول قصص حقيقية، ويحقق مؤخرا نجاحا كبيرا ونسبة مشاهدة عالية.
وتأتي مشاركة عمر حسين في مسلسل ساعته وتاريخه بعد مشاركته الناجحة في برنامج اكتشاف المواهب كاستينج، الذي عرض مؤخراً وكانت حصيلته إختيار 13 فنان من الشباب الموهوبين للمشاركة في العمل بأدوار هامة، وتمكن عمر حسين من لفت الأنظار إليه في البرنامج وأشاد الكثيرين بالموهبة التي يتمتع بها سواء المخرج عمرو سلامة أو مدربة التمثيل الشهيرة مروة جبريل، فضلا عن إشادة ضيوف حلقات البرنامج من النجوم الكبار به وكذلك الجمهور الذي توقع مستقبل فني مميز له في السنوات المقبلة.
وتحدث عمر حسين عن بداياته والصعوبات التي مر بها في تصريح لـ أهل مصر قائلا:'أنا بحب السينما من صغري، وأبتديت تمثيل في المسرح من ١٠ سنين لأن في السويس مكنش فيه فكرة تصوير أفلام أو ما شابه، وكنت بتابع دايما أخبار الكاستنج و الأوديشن وأخدت ورش كتير في التمثيل السينمائي، لكن حاولت أبدأ في السويس وأخرجت أفلام قصيرة وألفت سيناريوهات لعدة أفلام قصيرة تم تصويرها في السويس بعد مشاركتي في مدرسة السينما والفنون واجتزت فيها اختبارين، وبعد كده توقفت بعد جملة اتقالت لي 'خليك ف الرسم أحسن لك' من واحد من أهم الناس اللي موجودين بيشتغلوا مسرح في السويس، توقفت شوية لحد ما شوفت بوست واحد صاحبي منزله عن برنامج كاستينج للمخرج عمرو سلامة وقلت أقدم ومكنتش متخيل أني هتقبل لحد ما لقيت تليفونى بيرن:'الو مين' ليرد الطرف الآخر:'أنا عمرو سلامة'.
وتابع عمر حسين:'هنا بجد حسيت أن حياتي اتغيرت بسبب الكلام اللي قالهولي أستاذ عمرو وحسيت فعلا أني لأزم أثبت لنفسي أني ماليش في الرسم وبس ودي أول فرصة حقيقية تيجي ليا من بعد ما درست في ورشة نقابة المهن التمثيلية وورشة الأستاذة مروة جبريل، ولما دخلت البرنامج لقيت معاملة جميلة جدا من كل كرو العمل من أول مخرج البرنامج الأستاذ مارك حنا لحد أصغر حد في المجال، و بيتعاملوا معانا بأحترام وحرفية كأننا ممثلين محترفين وكل يوم بيعدي عليا كنت بستفيد أكتر وأكتر من الأستاذ عمرو والأستاذة مروة، وإزاي نتعامل مع اللوكيشن الحقيقي والضغط، وكنت فخور جدا أني بتشغل تحت أيديهم وأن دي هتبقي خطوة مهمة في حياتي'.
وعن صعوبات البرنامج قال عمر حسين:'من أصعب الحاجات اللي مرت عليا في البرنامج هو التنوع اللي كان المفروض أتعامل معاه لحظيا سواء أكشن أو كوميدي أو صامت أو ارتجال او كتابة او لهجات'.
وأضاف:'من وقت دخولي للبرنامج وأنا حاسس أني كل يوم بيعدي عليا وكل حلقة بتخلص هي حلم مش حقيقة، والكلام الإيجابي اللي كان بيتقال من الكرو سواء في الكواليس أو قدام الكاميرا كان بيحسسني أن هو ده مكاني الصح، ووصلت في البرنامج لحد المرحلة النهائية وكنت علي وشك أني هبقي من الـ ١٣ بطل اللي هيتم اختيارهم ولكن كان للأستاذ عمرو رأي تاني، وبعد ما اتعرضت الحلقة وعرفت أن آرائهم كانت إيجابيه جدا وخصوصا الاستاذة مروة جبريل، متضايقتش خالص ولا حتي من الأستاذ عمرو لإن أكيد ليه وجهة نظر ورضيت، وقولت خلاص كده أكيد مش هشارك في المسلسل طالما أنا مش من الـ ١٣ فائز، ولكن حصل العكس تماماً شاركت في المسلسل بأدوار مهمة تأثر في الناس وفي تاريخي كممثل'.
ويواصل عمر حسين حديثه قائلا بفخر:'التجربة دي بجد فرقت معايا في فهمي لمجال التمثيل وللوسط الفني بشكل عام وفعلا لكل مجتهد نصيب وربنا سبحانه وتعالى قال 'وأن ليس للإنسان إلا ما سعي '، ميعاد الحلقة الأولي ليا في مسلسل ساعته وتاريخه في حلقة ( ٣ غرز ) ستعرض الخميس الموافق 19/12/2024، وجميع قصص المسلسل حقيقية من ملفات المحاكم المصرية وأجسد في المسلسل شخصية شاب شعبي يحب صديقه جدا ويريد أن يساعده بأي طريقة'.
ووجه عمر حسين رسالة في نهاية حديثه قائلا:'حابب أقول رسالة لكل الشباب اللي شاركوني حلم برنامج كاستنج إني بحبهم جداً ويارب يفضلوا ديما بالطموح والشغف اللي هما كانوا فيه، وأما بالنسبه للشباب اللي ربنا كرمهم وشاركوا في المسلسل بجد أنا بحبهم جدا وبتمنالهم كل خير وعارف أن هما هيبقوا نجوم في القريب العاجل ان شاء الله، بعد المسلسل والبرنامج أكيد مش هبطل سعي وفي خطوات جاية أظن هتبقي خير كبير ليا أن شاء الله وأتمنى أبقى موجود في السباق الرمضاني القادم'.
تابعوا آخر أهل مصر على Google News
