"باع كل حاجة عشان خاطر واحدة ست عرفت تضحك عليه، اتعرف عليها ونسي كل حاجة حتى بناته ما بقاش يسأل عليهم، وسبنا لوحدنا فى الشقة، مفكرش حتى يسأل علينا ولا عايشين أزاى، على الرغم إنه عارف إنه مشي واحنا من غير ولا مليم معانا، ونزلت اشتغلت عشان أعرف أجيب أكل لعيالي وقلت الحمد لله على كده، لكن هو سمعته بقت على كل لسان إنه عايش في الحرام مع واحده مطلقة، عشان كدا فكرت إني أنفصل عنه"، جاءت هذه الكلمات على لسان أسماء وهي داخل محكمة الأسرة لرفع دعوى خلع من زوجها بعد ست سنوات من الزواج مؤكدة على استحالة العيش معه.
روت الزوجة قصتها لـ"أهل مصر" قائلة: "تجوزت من ست سنين جواز تقليدي مع شاب بيشتغل فى ورشة، واتعرفت عليه لأنه كان على علاقة بصديق والدي، وكنت حاسة براحة معاه، ولما اتجوزنا كانت الحياة مستقرة بينا، والخلافات كانت بسيطة وربنا أكرمني ببنتين منه، لحد فجأة من شهور كدا بدأ يتغير فى المعاملة والسهر كتر بره البيت، ولما أسأله يقول لى "كنت مع أصحابي" لكن طريقته كلها كانت متغيرة حتى العلاقة الزوجية بدأ ينفر منها، وكأنه مش طايق حتى يشوفني كنت بحاول أشوف اللى مضايقة، لكن هو كان بيصدني".
وتابعت أسماء: "بدأ احساسي يؤكد إنه فى حياته ست قلبت حاله، وبقيت أراقب تليفونه لحد ما اتأكدت إنه على علاقة بواحدة مطلقة، واتخانقت معاه، وكنت فاكره إنه هيبعد عنها، لكن اللى حصل العكس جمع هدومه وساب البيت ولا فكر فى بناته ولا إيجار الشقة ولا المصاريف وعرفت إنه راح عندها، وعايش معاها واضطريت إني أنزل أشتغل، وصرفت على بناتى، لكن كنت بضايق من اسمه وأن الناس بتتكلم عنه عشان كدا رفعت دعوى خلع بمحكمة الأسرة وانتظر أولى الجلسات بالمحكمة".
تابعوا آخر أهل مصر على Google News
