تامر أمين يعتذر لأهالي الصعيد للمرة الثانية: "جزمتكم على راسى من فوق" (فيديو)

اعتذر الإعلامى تامر أمين، عن إهانته لأهالي الصعيد في برنامجه، بعد تصريحاته عن أبناء وبنات الصعيد والريف، بعدما قال في برنامجه الذي يذاع على قناة النهار، 'إن الناس هناك يقوموا بالخلفة 'علشان عيالهم هم اللي يصرفوا عليهم'.

تامر أمين

وقال في فيديو صباح اليوم الجمعة: 'أقدم اعتذار واضح وصريح لا لبس فيه لكل أهالينا في الصعيد وفى كل مكان بمصر، اللي زعلانين مني، أنا لا هكابر ولا هآوح، أنا من الناس اللي بتعتذر لما تحس إن الناس زعلانة منها، حتى لو كانت نيتي يعلم بيها ربنا نيتي خير وكان الهدف هو المصلحة العامة'.

وقف برنامج تامر أمين

وأضاف تامر أمين: 'أنا أكتر حاجة تضايقني في الدنيا إن واحد صعيدي بس أو واحدة صعيدية بس يزعلوا مني، وأنا من أكتر المؤمنين بالصعيد واحترام الصعيد وعزة نفس الصعيد وكرامة الصعيد وأصل الصعيد، صعيد مصر هما أصل مصر اللى طلعولنا الناس المفكرين والأدباء والناس الشريفة المحترمة'.

وتابع تامر أمين: 'والله ما أقصدتش الإهانة أبدأ، ودي آخر حاجة تيجي على دماغي، وآخر حاجة في الدنيا إن يبقى حد صعيدي زعلان مني، فأنا بقول لكل صعيدي وصعيدية جزمتكم على راسي من فوق، وأنا ابنكم وأنا ابن ريف مصر، ونسايبي أساساً من الصعيد مرات أخويا من الصعيد وبتشرف بيها وبالنسب دا'.

واستكمل تامر أمين :'أرجوكم متزعلوش مني وحتى لو كان قصدي خير بس لو واحد فيكم بس زعلان أنا بقوله حقك عليا وأنا آسف في اعتذار صريح وهذا الاعتذار سينشر في كل مكان'.

وكانت شبكة قنوات النهار أصدرت بيانا، تعتذر فيه لأهالي الصعيد والريف، بسبب ما بدر من الإعلامي تامر أمين المذيع بإحدى قنواتها الفضائية، والذي يطل على الشاشة من خلال برنامج 'أخر النهار'، حول تصريحاته عن أبناء وبنات الصعيد والريف، بعدما قال في برنامجه الذي يذاع على قناة النهار، 'إن الناس هناك يقوموا بالخلفة 'علشان عيالهم هم اللي يصرفوا عليهم'.

أزمة تامر أمين

وبدأت الأزمة بتصريح غير مسئول من الإعلامي تامر أمين، من خلال برنامجه أخر النهار المذاع علي 'قناة النهار الفضائية'، بقوله إن الأهالي في الريف والصعيد ينجبون الأطفال لا للاتحاق بالتعليم بل للإنفاق عليهم مؤكدا: 'نسبة كبيرة في الريف والصعيد بيخلفوا ولاد وبنات، مش علشان يصرفوا عليهم ويخدوا شهادات ويتعلموا ويبقى عندهم فرص عمل إنما بيخلفوهم علشان العيال دي هم اللى يصرفوا على الأب والأم'.

وأضاف: 'في أسر كتير أوي بيخلف الولد وأول ما يبقي عنده 5 أو 7 سنين بالكتير يرميه علي ورشة سمكرة أو دوكو أو يبقي فواعلي يشتغل في المعمار المهم يشتغل وإعلاميًا بنسميه الواد بلية صبي الأسطي، فيروح الاسطي يديله 1000 جنيه ياخد الولد الفلوس أخر الشهر يرموهم في حجر أبوه ده الولاد، لو جاله بنت هيغلب أو يدخلها المدرسة لأ، البنات اول ما تبقي 8أو 9 سنين اشحن تشتغل في البيوت وفيه ازمة في الخادمات فبتتشحن للقاهرة أو الإسكندرية'.