الرئيس السيسي: دخلنا مرحلة بداية التحسن الاقتصادي

قال السيد الرئيس عبدالفتاح السيسي، في كلمته خلال حفل الإفطار السنوي الذي أقامته القوات المسلحة، إن مصر في بداية التحسن الاقتصادي.

وأضاف الرئيس السيسي: «إحنا في بداية التحسن، رغم إن الرقم 7 أو 8 مليار دولار مش بسيط، وزير المالية لما تتكلم معاه يقولك المبلغ دا لو معانا دلوقتي هنعمل حاجات كتير، وهنبقى في ظرف أحسن من كده، والحمد لله، احنا ماشيين وهنستمر بفضل الله، والأحوال هتتحسن بفضل الله وبفضل المصريين، وعمل كل المؤسسات، وما تتوقفوش وتنظروا للخلف، ماتبصوش وراكم إلا للعلم وللدرس والفهم عشان ماتتكررش أخطاء، واحنا باصين قدامنا وبنتحرك في كل المجالات بهدوء شديد وتخطيط مدروس وربنا يوفقنا فيه ويطرح البركة، لما دولة رئيس الوزراء بيتكلم، السنتين اللي فاتت كانت الظروف صعبة».

وأكمل الرئيس السيسي: «متطمنين طبعا، ومؤسسات الدولة متطمنين طبعا، ولما بقول الجيش والشرطة مقصدش بيها دول فقط، لكن بعتبرهم في الظروف دي، هم محوري الارتكاز لأمن واستقرار الدولة المصرية، وبنبص على اتجاهات الجنوب مع السودان، وطبعا كلنا متابعين، ومع أهلنا في ليبيا، وأماكن تانية كتير، وكل دا له تأثيرات، ولكن بفضل الله احنا في وضع كويس، وبطمن المصريين ودي تالت مرة أقولها، لأني لمست في الشهرين التلاتة اللي فاتوا خوف، وإن يبقى عندنا قلق على بلدنا أمر محمود».