يواصل موقع 'أهل مصر' نشر نص اعترافات المدعو 'مغاوري. ح. أ. ش'، 34 سنة، مقيم قرية سنهور المدينة بمركز دسوق، والمتهم بإنهاء حياة جاره بمعاونة والده وأشقائه الثلاثة، والتي أدلى بها أمام جهات التحقيق في القضية رقم 19372 لسنة 2024 كلي كفر الشيخ، والمقيدة برقم 2195 لسنة 2024 كلي كفر الشيخ. وإلى نص التحقيقات.
صورة تعبيرية
نص اعترافات المتهم
س: ما تفصيلات إقرارك؟
ج/ اللي حصل أن بعد ما أبو 'محمد. ش' مات من خمس شهور كده كان في أرض لينا 16 قيراط، 'محمد. ش' قال لواحد عايز أمشي على المروى وأطلع وأنزل من عليها، والمروى دي أصلًا مسدودة بس الري شغال، وأبويا عرف أن 'محمد. ش' عايز يعمل كده ووافق وجبنا جرار، وحد السكة وفصلها عن بعضها، وأبويا قال له قبل ما يفصلها لو 'محمد. ش' ليه طلب أنا ليا طلبين أولهم تقليع الشجر، ومش فاكر الطلب الثاني.
واستكمل المتهم في اعترافاته أمام جهات التحقيق قائلا: تاني يوم 'محمد. ش' جاب تعيين للرشا اللي في السكة، والناس قالت التقليع بعد التعيين وبعد ما خلصنا التعيين محمد منفذش الطلبات بتاعت أبويا والمشكلة اتحولت بينا لشكاوي في المركز، واحنا كنا بنعمل فيه محضر وهو كمان كان بيعمل محضر.
وتابع: وكانت بينا خلافات لحد ما أمه ماتت قبل الخناقة بأربع أو خمس أيام كان في سكة بتاعتنا محمد اللي مات ملوش فيها حاجة وهو بيعمل عزا أمه احنا حطينا الجرار بتاعنا في السكة بتاعتنا وفي سكة رئيسية للي يجي يحضر العزا، وبعدين يوم الجمعة اللي فاتت إخواتي ال 3 راحوا يرشوا الأرض، وأبويا وأخويا 'و' مكانوش معاهم، و'محمد. ش'
وأخواته طلعوا عليهم بالبلط والسكاكين، واحنا في البيت لما الناس قالت لنا روحنا أنا وأبويا وأخويا 'و' وروحنا جبنا أخوالي وضربناهم عشان مايتعاركوش مع بعض، وفي نفس اليوم ناس قالوا هتعملوا قاعدة يوم الجمعه الجايه وخدوا علينا وعلى الطرف الثاني وصولات أمانة على القاعدة بتاعت يوم الجمعة.
وأردف: وفي ناس قالت مفيش رش النهاردة هنرش بكره، وفي ناس تانية في القاعدة قالت خلو الرش بعد القاعدة ومرشناش غير يوم الحد.
وأضاف بالقول: وقتها كان موجود 'محمد. ش' 'المتوفى' وناس تانية، واختلفوا مع أهلي أنهم مش هيرشوا، وأبويا وأخواتي بيقولوا والله هنرش وكان كله بيحلف على بعضهم بالطلاق أنه هيرش والتانيين بيقولوا مش راشين.
وتابع: محمد 'المتوفي' قال لأبويا وريني أنت هترش إزاي وامشوا يلا، ومحمد وهو واقف كان معاه سلاح مش فاكر إيه هو و'ح' أخوه كان معاه نبوت جه جري علينا وهو ماسك السلاح،
وساعتها كنا عاملين حسابنا من قبلها تحسبًا أن يحصل أي حاجة وكنا رايحين ومعانا عصيان ونبابيت في الجرار وقت الخناقة عشان هما قبل ما نرش بيومين طلعوا علينا بسلاح والعصيان دي كانت في شكارة بيضا روحنا وقت الخناقة جيبناها كلها ونزلنا ضرب في بعض كلنا، و'محمد. ش' ضرب أخويا في صدره وأنا جبت النبوت وكنت عايز أسلك بينهم ونزلت ضرب عليهم عشان يبعدوا عن بعض ومكنتش عارف أنا بضرب مين وأنا مشفتش میں ضرب مين عشان الدنيا كانت زحمة.
وتابع: وفجأة لقيت 'محمد. ش' واقع على الأرض وسايح في دمه وقام ركب الموتوسيكل ورا واحد مش فاكر هو مين وساعتها 'م. م' كان راقد فوق أخويا 'إ' في أرض الرز وأنا مشفتش 'م. م' في إيده سلاح اللي أنا شوفته الضربة التي ضربها له 'محمد. ش' في أول الخناقة، و'م. م' مكنش معاه أي أسلحة وده كل اللي حصل.
واستكمل حديثه قائلا: وبعد كده كله روح والخناقة انفضت وأخدت أبويا وأخواتي وروحنا على البيت، وأنا كنت ماشي على رجلي ومعايا أبويا، وأخويا 'و' كان مروح وهو راكب الجرار عشان احنا كلنا قاعدين في بيت واحد وأنا مروح العزبة كلها كانت بتصوت، ولما وصلنا البيت أنا طلعت غيرت هدومي وأنا بغير هدومي سمعت الناس بتقول 'محمد. ش' مات.
وكانت محكمة جنايات فوه بمحافظة كفر الشيخ قد قضت بالإعدام ل4 أشقاء لاتهامهم بإنهاء حياة جارهم بسبب خلاف على ري الأرض الزراعية بمعاونة والدهم، وذلك بعد وفاة والدهم داخل محبسه خلال سير التحقيقات بالقضية.
تابعوا آخر أهل مصر على Google News
