مرتضى منصور يعلن رفضه انسحاب الزمالك من السوبر.. ويؤكد: كهربا والشناوي مش هيلعبوا الماتش

حسم مرتضى منصور، رئيس نادي الزمالك الصادر قرار بعزله من رئاسة القلعة البيضاء، موقفه من الانسحاب من مباراة الأهلي في السوبر المصري.

وقال مرتضى منصور، خلال تصريحات تليفزيونية عبر قناة الزمالك: «مع احترامي للجميع لو سمعت كلام الناس اللي بتطالبني بالانسحاب مش هيبقى فيه نادي، عندنا جمعية عمومية ومجلس إدارة بياخدوا قرارات».

وأضاف مرتضى منصور: «أنا مش بخاف إلا من اللي خلقني ولست رجل دولة بدليل إني لسه خارج من السجن ومعزول من رئاسة النادي».

مرتضى منصور: أمير هو اللي اختار أوسوريو

وعن اختيار الكولومبي خوان كارلوس أوسوريو مديرًا فنيًا للزمالك، قال مرتضى: «اللجنة الفنية لم يكن لها أي علاقة باختيار أوسوريو، أمير مرتضى هو اللي اختاره رغم إن محدش أشاد بيه».

وتابع: «اللجنة الفنية اختارت الراجل الألماني اللي هرب والإسباني اللي مردش عليهم».

وواصل مرتضى: «الزمالك قدام سيراميكا كليوباترا كان مكتف الخصم وكان بيهاجم بكل قوته مش زي فيريرا اللي مع احترامي له كان بيدافع والجمهور ييجي يقول لي اوعى جدو فيريرا».

وأردف مرتضى منصور: «لايحة لجنة الانضباط بتقول إن قراراتها تُنفذ حتى لو تقدم النادي بتظلم.. أنا لن أسافر للإمارات احترامًا لقرار لجنة الانضباط مع إني قدمت تظلم».

واستكمل مرتضى: «عندي اتنين من اللاعبين محمد الشناوي ومحمود كهربا موقوفين ومش من حقهم يلعبوا مباراة الزمالك في السوبر».

اختتم مرتضى: «على اتحاد الكرة ولجنة التظلمات حل مشكلة كهربا والشناوي لأنها ستكون مشكلة كبيرة في حال لعبوا مباراة السوبر».

موعد مباراة الأهلي والزمالك

ومن المقرر أن يلتقي الفريق الأول لكرة القدم بالنادي الأهلي مع الزمالك، يوم الجمعة المقبل الموافق 5 من مايو، على ستاد «محمد بن زايد» بالإمارات، في السوبر المصري.