رقية تطلب الخلع: "بيعايرني عشان جسمي اتغير بعد الولادة"

'تعبت من الخناق ليل ونهار من بعد الولادة القيصرية، بسبب كلام جوزي وانتقاده لكل حته في جسمي، وديما يقلل مني ويقولي جسمك باظ، واتغيرتي للأسوء، بعد الولادة القيصرية والرضاعة، لحد ما فقدت الثقة في نفسي تماما، وبقيت احس إني مش مرغوبة وآثر على نفسيتي من ابني، عشان كدا فضلت أبعد من دلوقتي عشان مدمرش ابني معايا'.. جاءت هذه الكلمات على لسان رقية وهي داخل محكمة الأسرة لرفع دعوى خلع بعد 3 سنوات من الزواج.

وروت رقية قصتها لـ 'أهل مصر': أنها تزوجت منذ 3 سنوات زواجا تقليديا من شاب يكبرها بـ٤ أعوام قائلة: 'لما اتخطبنا كان ديما يقولي جسمك حلو، حافظي عليه، لكن مكنتش متخيلة انه مش بيحب غير جسمي فقط لكن الإنسانة اللي معاه متفرقش نهائي معاه، لحد ما اتجوزنا، وكانت الحياة مستقرة بيننا، لكن بدأ يتغير معايا تدريجيا من أول الحمل، وكان بيقعد في شغله أوقات كتيرة، ومن حملي مكنتش مركزة أوي أنه متغير كتير لحد ما ولدت ابني وحالتي اضطرت أولد قيصري.

وتابعت حديثها: وأنجبت طفل وكنت سعيدة جدا وهو أيضا، حتى مرت الأيام والشهور وبدأ يعلق على جسمي ووزني الزائد، والولادة القيصرية، وبدأت المشاجرات بيننا بسبب تعليقاته السخيفة، وأصبحت لا أحتمل أكثر من ذلك وقررت طلب الطلاق ولكنه رفض واشترط أن يأخذ ابنه فرفضت وذهبت إلى محكمة الأسرة لرفع دعوى خلع ومازالت الدعوى منظورة أمام القضاء.