ولاء في دعوى الخلع: كذب عليا وقالي العيب من عندك

"سنتين ونص ضيعتهم من عمري مع واحد كداب وغشاش، كنت بتعذب قدامه والف على علاج عشان أخلف، وهو عارف أن السبب منه من غير ما يقول، وفبرك تحاليل غلط تؤكد أنه سليم ومش عنده حاجة، لحد ما ربنا فتح بصيرتي وخلاني عرفت حقيقته، وأنه عقيم من قرايب طليقته الأولى".. هكذا بدأت ولاء الحديث عن قضية الخلع التي قدمتها ضد زوجها بعد عامين ونصف من الزواج، مبررة استحالة العيش معه.

وتقول ولاء لـ"أهل مصر": "لما واجهته أنكر في الأول لحد ما أصريت نروح نحلل في عيادة دكتور أنا اللي أختاره"، مشيرة إلى أنها تزوجت زواجا تقليديا من شاب يكبرها بـ9 أعوام، وسبق له الزواج قبل ذلك وانفصل عنها بسبب الأزمة ذاتها.

وتابعت: "لما سألته انفصل ليه عن مراته قال بسبب ظروف شغلها مش مناسبة معايا، وأنها بتشتغل ممرضة وبتحتاج تبات أيام في المستشفى، واقنعنت بكلامه، واتجوزنا وكانت الحياة بيننا مستقرة، وكان بيجيب كل حاجة محتاجها، لكن كنت دائما زعلانة وقلقانة بسبب تأخر الإنجاب، والغريب أنه كان لا يشجعني على الذهاب للطبيب".

وأكملت حديثها: "قررت بعد سنة كاملة من الجواز أن أذهب للدكتور؛ وعندما طلب منا التحاليل، اكتشفت أني مش محتاجة غير منشط، لكن زوجي كان سليما ولا يعاني من أي مشكلة، وخضعت للعلاج وانتظمت على الأدوية والعلاج لمدة عام ونصف، دون أن يخبرني بأي شئ عن الحقيقة، لحد ما ربنا أراد أن أعرفها بنفسي عن طريق زوجته القديمة التي أخبرتني أنه لا يصلح للإنجاب".