أسماء لقاضي الأسرة: "هددنى بميّة النار عشان رفضت اديله ورثي"

لم تتخيل أسماء صاحبة الـ٣٠ عاما، أن زوجها الذى أوهمها أنه يعشقها، كان يستغلها وتزوجها من أجل المال فقط لا غير، حيث إنها منذ أن تزوجت وهو يطلب منها أموالا بحجة عمل مشروعات، وبعد أيام يخبرها أن المشروع فشل والأموال ضاعت، حتى قررت ألا تعطى له أموالا مرة أخرى، لتبدأ الخلافات بينهما بعد عام واحد فقط من الزواج ويهددها بالقتل، وسكب مياه نار على وجهها إذا لم تعط له كل الأموال التى ورثتها عن والدها فى البنك، لتقف داخل محكمة الأسرة لرفع دعوى خلع من زوجها مبررة استحالة العيش معه.

وروت الزوجة قصتها لـ'أهل مصر' والدموع تفيض من عينها: 'عمرى ما كنت أتخيل ان يحصل معايا كدا أبدا، منه لله، أنا والدى متوفي وكنت عايشة مع والدتى لحد ما هو قابلنى، وعرف ظروفي، وأنا والدى ساب لنا ورث كبير، ورسم خيوطه حواليا لحد ما وقعنى فى حبه، واتجوزنا ومعظم الجهاز بفلوسي حتى الشقة أنا اللى كنت بدفع إيجارها، لكن هو مش مكتفي بكل دا، كل شوية يطلب منى فلوس عشان يعمل مشروع ويفشل، ويرجع يطلب تانى، لحد ما فاض بيا وحسيت ان فلوسي قربت تخلص، ولما رفضت أنه يأخد منى فلوس تانى اتغير فى المعاملة'.

وتابعت حديثها: 'بقي إنسان تانى، يشتمنى ويضربنى عشان يجبرنى أسحب فلوس ولما رفضت هددنى أنه هيشوه وشي بمياه نار، ومرات هددنى بالقتل عشان كدا رفعت عليه دعوى خلع فى محكمة الأسرة ومنتظرة أولى الجلسات، وبعدها هسافر وأسيب له الدنيا'.