عزة تطلب الخلع: "أمه عاوزاه يتجوز عليا ويجيب لي ضرة"

"من أول ما اتجوزنا وحماتى دايما فى خناق، بسبب الغيرة معايا، على الرغم إنى بعاملها بمنتهى الأخلاق، لكن هى عايزة تثبت إنى محدش أحسن من بناتها، وبدأت تخترع مشاكل من تحت الأرض لحد ما فى يوم أقسمت بالله أنه يتزوج تانى ويجيب لى ضرة تعيش معايا".

جاءت هذه الكلمات على لسان عزة وهى داخل محكمة الأسرة لرفع دعوى خلع من زوجها بعد عامين ونصف من الزواج مبررة استحالة العشرة معه.

وروت الزوجة قصتها لـ"أهل مصر": "تجوزت من سنتين ونص زواج صالونات، من شاب يعمل مع والده، وأنا على قدر من الجمال، بشهادة الآخرين وهذه المشكلة أن حماتى ديما شايفة إني قليلة وإنى لازم أعيش خدامة ليها ولبناتها المتجوزين".

وتابع "كمان جوزى كان مفهمنى قبل الفرح أنه هو صاحب القرار عند أهله، لكن اكتشفت بعد الجواز حاجات غير كدا أنه بيمشي وراء كلام أمه من غير نقاش، وطبعا الخلافات زادت بسبب تحكمات والدته وطلباتها اللى مش بتخلص، وبدأت تشتم فيا قدامى وجوزى مش بيدافع عنى نهائي، لحد ما غلطت فى أهلى، ورديت عليها".

وواصلت "أقسمت بالله على ابنها أنه يتجوز عليا ويجيب لى ضرة تعيش معانا، وفعلا أخدته وبدأت تشوف عرايس وتقابلهم؛ وجوزى ماشي وراها، ولما أكلمه يقول لى انتى اللى غلطتى وأنا مقدرش أكسر كلام أمى، سبتلها البيت تشبع بيه، ورفعت دعوى خلع وما زالت الدعوى منظورة أمام القضاء".