تقدمت "علا" بدعوى قضائية أمام محكمة الأسرة لرفع دعوى خلع من زوجها بعد عامين و7 أشهر زواج بعد أن أصبحت لا تحتمل العيش معه بهذا الشكل مبررة ذلك بقولها "بجد أنا تعبت بقالي ٧ شهور مش عارفة أنام جنب جوزي براحتي، من أول ما والده اتوفى ووالدته جات تقعد معانا عشان بتخاف من الوحدة، أنا معنديش اعتراض إنها تقعد معانا لكن أنا معترضة إنها بتنام جنبنا على السرير وبتحضن ابنها، وأا أولع مش مهم، ولما طلبت من جوزي إنه يطلب منها تنام مع العيال على السرير، اعترض وعمل مشكلة لدرجة إنه غلط فيا".
وروت الزوجة علا قصتها لـ "أهل مصر" قائلة: "أنا من أول ما اتجوزت وأنا عارفة إن حماتي مش بتحبني، لكن كنت بتجنب الخناق معاها، عشان الأمور تمشي والدنيا تعدي، على الرغم من غيرتها مني وعايزة جوزي على طول معاها، وهو مش بيحب يزعلها، لحد ما والده اتوفى وطلب مني إنه والدته هتعيش معانا لأنها متقدرش تقعد لوحدها، وأخواته مش بترتاح عندهم، وأنا وافقت عادي على أساس إنها هتقعد مع الأولاد فى الأوضة لكن اتفاجت إنها بتنام وسطنا وبقت على كدا على طول وكأنها مصدقت وتنام وتحضن جوزي، ولما اعترضت وطلبت منه إنها تنام في أوضة الأطفال اتخانق معايا".
وتابعت حديثها قائلة: "بقينا فى خناقات مستمرة بسبب الموضوع ده حتى العلاقة الزوجية بحس إني بعمل حاجة غلط أو بسرق لأنها لازم تكون معزومة عند حد من أولادها عشان جوزي يقرب مني، لحد ما طفح الكيل وقررت إني أخد موقف جد ووسعت الخناقة زعلت فيها لأول مرة جامد جدا، وسبت البيت وطلبت الطلاق لكن رفض وحاول معايا لكن رفضت وصممت على طلب الطلاق ورفعت دعوى خلع ومازالت الدعوى منظورة أمام القضاء".
تابعوا آخر أهل مصر على Google News
