ياسمين تطلب الخلع: مش عايزة أمشي في الطريق الغلط

لم تتخيل ياسمين أن قسوة زوجها ومعاملته الشديدة معها وإهانتها ستجعلها تلجأ إلى التحدث مع أحد الشباب على مواقع الإنترنت لكي تشعر بـ ثقتها مرة أخرى على الرغم أنها لم تفعل ذلك قبل الزواج، لـ ينتابها شعور الذنب فتقرر الانفصال عن زوجها أفضل من السير فى الطريق الخطأ، مما جعلها تقف داخل جدران محكمة الأسرة لرفع دعوى خلع من زوجها بعد عام و 3 شهور من الزواج مبررة استحالة العشرة معه.

وقالت الزوجة في مستهل حديثها مع "أهل مصر" : "من أول يوم جواز وانا اتاكدت اني أساءت فى الاختيار، لما اتخانق مع أهلى بسبب زفة العربيات، وكان بيغلط كتير لكن الناس تدخلت وفضوا الموضوع سريعا، واكتشفت إن الإنسان اللى عرفته فى الخطوبة مش هو اللى اتجوزته، وبقيت بحاول اتاقلم معاه عشان احافظ على بيتى ومبقاش مطلقة من أول أيام فى الجواز".

وأضافت: "لكن هو زاد فيها اوى بقى يعاملني بجفاء، مفيش كلمة حلوة اسمعها منه، دايما كلامه قاسي، محستش بأي لحظة وحنية منه، لكن كان بيضربنى ويذل فيا على أتفه الأسباب، لحد ما كنت بحاول اعوض شعور النقص اللى عندي وللأسف اتكلمت مع شاب على النت يومين وحسيت بالذنب لأني عمرى ما عملت كده".

وتابعت حديثها قائلة: "حسيت اني بخسر احترامي وهغضب ربنا بسببه، عشان كده قررت انفصل عنه وخاصة ان مفيش أطفال بينا، وطلبت منه الطلاق، لكنه ذلني ورفض يطلقني ويقول لى لما يجى مزاجى ابقي افكر.. عشان كدا حكيت لـ أختي ووقفت جنبي ورفعت دعوى خلع ومازالت الدعوى منظورة أمام القضاء".