رحمة تطلب الخلع: "مقضيها مع الستات في بيوت الدعارة وهاجرني"

"هو بيعمل كل اللي نفسه فيه، وبيخوني كل يوم مع واحدة، وخاصة لما اتعود على الحرام وعرف طريق شقق الدعارة والمواقع الإباحية مع أصحابه السوء اللي زيه، لكن من 4 شهور ابتعد عني نهائيا واكتفى بالعلاقات الحرام اللي بره، لحد ما طلبت الطلاق بدل العيشة المهينة دي، لكن لقيته بيقول لي مش هطلقك وعيشي ربي العيال، عايز يسبني متعلقة لا متجوزة ولا مطلقة وهو عايش حياته"، جاءت هذه الكلمات على لسان رحمة، وهي داخل محكمة الأسرة لرفع دعوى خلع من زوجها بعد ٦ سنوات من الزواج مبررة استحالة العشرة معه.

وروت الزوجة قصتها لـ"أهل مصر": "اتجوزت من ٦ سنين جواز صالونات، ووافقت عليه بعد إقناع من أهلي أنه كويس وشقته كويسة، وفعلا هو في البداية كان هادئ جدا لدرجة أني كل اللي يشوفه يحسدني عليه، لكن بعد الجواز اكتشفت أن كل دي أوهام وخيال، وأن أخلاقه مش كويسة، راجل بتاع ستات وعلاقات نسائية كتيرة، وخاصة لما اتلم على شلته السوء وعرف طريق شقق الدعارة والمواقع الإباحية معاهم وكل ليلة يسهر لحد ما بقى شخص لا يطاق من كتر الذنوب اللي بيعملها، وكان بيضربني وكنت متحملة عشان العيال".

وتابعت: "لحد ما بقى يبعد عنى، وخاصة في الفراش هجرني 4 شهور ومقضيها مع الستات بره وعلى راحته، لدرجة أني فكرت أعرف رجالة وانتقم منه بس أخلاقي متسمحش، عشان كدا فكرت وطلبت الطلاق لكن رفض وقالي عيشي ربي عيالك واسكتي، عشان كدا قررت أرفع دعوى خلع بمحكمة الأسرة وأنتظر أولى الجلسات".