علا تطلب الخلع: "جوزي بيهددني بشرفي"

لم تتخيل علا أن زوجها ووالد طفلها يهددها بدعوى زنا ويتهمها فى شرفها أمام الجميع، بسبب خلافات تافهة بينهما أو ماديات، مما جعلها تقف داخل محكمة الأسرة لرفع دعوى خلع من زوجها بعد 3 سنوات من الزواج مبررة ذلك بقولها: "بخيل جدا وكمان عصبي على أتفه الأسباب لدرجة إنه وصل بيه الحال إنه يهددني بشرفي ويتهمنى بالزنا ومش همه سمعة ابنه اللى ممكن يتأذى بسبب الكلام دا لحد ما خفت إنه يغدر بيا ويعملها فعلا قررت أسيب البيت وأمشي بدل ما ألبس قضية زنا".

وقالت الزوجة في مستهل حديثها مع "أهل مصر": "اتجوزت من ٣ سنين جواز صالونات وطبعا عشان كنت عايزة أهرب من تحكمات مراة أبويا وافقت على أول عريس اتقدم ليا ومكنتش أعرف أى حاجة عنه، لحد ما ظهرت عيوبه بعد الجواز واكتشفت إنه بخيل جدا بيعد عليا اللقمة اللى باكلها، ممنوع أخد مصروف فى إيدى غير الطلبات اللى بيشتريها ووفر كمان واضطريت اتحمل عشان خلفت منه طفل لكن عصبيته بدأت تزيد، واتفاجأت انه بيهددنى بشرفي".

وتابعت حديثها قائلة: "فى آخر خناقة بيننا حكيت لأهلى وأهله كل اللى بيعمله فيا وبخله الشديد معايا، وطبعا هو اتخانق واتهمنى بشرفي عشان يظهر نفسه قدوة قدام الناس عشان يخدعهم، لدرجة إنه كان بيصور التلاجة عشان يورها للناس وفى الآخر يرجع الأكل لأمه، وهددنى إنه هيرفع عليا دعوى زنا لو اتكلمت ربع كلمة عليه، خوفت عشان كدا سبت ليه البيت وطلبت الطلاق ورفض فرفعت عليه دعوى خلع ومازالت الدعوى منظورة أمام القضاء".