"جوزي _ربنا يصلح حاله_ مدمن علاقات الشات الإباحية مع البنات على النت وبيدفع كروت شحن لدرجة إن معظم اللي على النت بينصبوا عليه، حتى أصحابه بيعملوا فيه مقالب وياخدوا منه كروت شحن وهو مش بيتوب، طول الوقت اللي بيرجع من الشغل قاعد على النت ومقضيها مع البنات، ومعايا هجرني في الفراش واستبدل علاقتنا الحميمة بمكالمات الشات الجنسية ومهما عملت رافض يتغير".. جاءت هذه الكلمات على لسان نسمة وهي داخل محكمة الأسرة لرفع دعوى خلع من زوجها مبررة استحالة العشرة معه بعد أن رفض الابتعاد عن المكالمات الإباحية.
وقالت الزوجة في مستهل حديثها مع "أهل مصر": لما اتجوزت مكنتش أعرف إنه بالأخلاق السيئة دي، وما اكتشفتش غير لما اتجوزنا وبقينا في بيت واحد، أنا متجوزة من سنتين بس كانوا جحيم مش جواز بسبب تصرفاته الشاذة والغريبة، كنت بستحمل وأقول مصيره يتغير، عمري ما حسيت أنه مبسوط معايا في العلاقة الزوجية، ديما بحس أنه بيقضي واجب عشان منظره قدامي، وأول ما يرجع من الشغل يقعد على النت ويقفل عليه الأوضة ولو طلبت منه نقعد مع بعض يتحجج وينام ولما أنام أحس بيه بيخرج من الأوضة ومعاه اللاب توب الخاص به، لحد ما كنت بحس أنه بيعمل حاجة غلط، الأول فكرت أنه بيعرف واحدة بس.
وتابعت حديثها قائلة: حاولت أتوصل أنه بيخوني مع مين، لكن للأسف شوفت الشات وعرفت إنه ليه علاقات كتيرة مع ستات لكن كلهم مكالمات إباحية وعلاقات جنسية عبر الإنترنت، كنت مش مستوعبه ازاي بيعمل كدا، اتخنقت معاه واعترف إنه بيحب يعمل كدا، ومش هيقدر يبطل وقررت أساعده لكن مافيش فايدة، بقى الموضوع عادي بالنسبة له وطول الوقت على النت لحد ما زهقت من العيشه معاه وطلبت الطلاق ورفض فرفعت دعوى خلع ومازالت الدعوى منظورة أمام القضاء.
تابعوا آخر أهل مصر على Google News
