مروة تطلب الخلع: زوجي ممكن يفرط في شرفه عشان شوية تسالي وكيس فاكهة

"عمرى ما كنت أتوقع إن زوجى يبقي بالأخلاق دي، أو إني أتجوز حد مستعد يفرط فى شرفه وعرض أهل بيته مقابل إن واحد يجى البيت ويسهر معاه مقابل إنه جاب كيس فاكهة أو شوية تسالى وكام إزازة بيبسي، ودا كله عشان بيبخل عليا بالمصاريف عشان يصرفها على كيفه وشرب الحشيش اللى قرب يطير دماغه"، قالت مروة تلك العبارات وهى داخل محكمة الأسرة لرفع دعوى خلع من زوجها؛ مبررة استحالة العشرة معه بعد عامين و3 أشهر من الزواج.

وقالت الزوجة في مستهل حديثها مع "أهل مصر": "أنا متجوزة من سنتين و3 شهور، من شاب أكبر منى ب١٠ سنين، وبيشتغل فى عمل إدارى، وكنت مبسوطة لما اتقدم ليا وخطبنى بسبب معاملته الرقيقة معايا، لكن بمجرد الجواز كل حاجة اتبدلت وهو اتحول لإنسان تانى بخيل جدا لأبعد الحدود، وكمان عصبي وكل يوم خناقة على أتفه الأسباب وكلامه يسد النفس، لكن قررت أن أتحمل عشان ماطلقش بسرعة والناس تتكلم عليا".

وتابعت حديثها: "لكن اللى مقدرتش أتحمله إنه يتجرأ ويجيب أصدقاء السوء البيت، عشان بيجيبوا معاهم حاجات زى التسالى والبيبسي، وبقى شخصية قذرة وديوث، شايف صاحبه بيبص عليا نظرات مش مريحة وهو لا عمل حاجة، واكتشفت إنه بيشرب حشيش وضيع كل فلوسه عشان كدا رفعت دعوى خلع ومازالت الدعوى منظورة أمام القضاء".