لم تتخيل "أمل" أن زوجها في أقرب خلاف بينهما يجعلها تترك البيت وتذهب إلى بيت أسرتها ولا يسأل عليها هي وأطفالهما، حتى نفقات أطفاله لم يرسلها على الرغم أنه يعلم أن أولاده يحتاجون مصاريف المدرسة، وعندما أرسلت إليه رفض أن يدفع شيء وهددته أنها سترفع عليه دعوى نفقة لدفع مصروفات الدراسة وخاصة عندما رفض أن تعود إلى بيتها وعندما علم ذلك طعنها في شرفها أمام الأهل واتهمها بالخيانة مما جعلها تقف داخل محكمة الأسرة لرفع دعوى خلع من زوجها بعد 7 سنوات من الزواج مبررة استحالة العشرة معه.
وروت الزوجة قصتها لـ "أهل مصر": اتجوزت من 7 سنين جواز صالونات وكنت عايشة زي الجارية معاه عمري ما قولت لا على أي حاجة وكنت فاكرة إنه هيراعي كدا ويعاملني بما يرضي الله، لكن هو افتكر دا ضعف مني وبدأ يستقوى عليا وخاصة لما ربنا كرمني بطفلين منه، بقى يعرف عليا ستات وسهر وخروجات مع بنات غير المكالمات والشات، ومن كتر اللي بيعمله خلاني فاض بيا الكيل وقررت أتكلم ومش هسكت على حقي واتخنقت معاه لأول مرة صوتي يعلى عليه وأحس أني لازم أحافظ على كرامتي، وهو طبعا طردني من البيت أنا والعيال في بيت أهلي بحجة إن ازاي أعلي صوتي عليه واتخانق معاه، ودا حصل بعد ما ضربني.
وتابعت حديثها قائلة: قعدت في بيت أهلي ورفضت أتكلم ولا أغلط فيه قدام أهلي وقلت خلاف بسيط وهيعدي وأكيد هيسأل على أولاده لكن لقيته قلبه قاسي وبيتعامل بقسوة وكأنه ما صدق أننا نمشي حتى مصاريف العيال وهو عارف ان في قسط مصروفات مدرسة لازم يتدفع، وبعت ليه مع أكتر من حد ان أولادنا لازم يكونوا بعيد عن الخلاف لكن رفض يبعت أي مليم، وهددته إني هرفع دعوى نفقة فوجئت بعدها أنه يتهمني في شرفي وبيقول كلام محصلش وأنه طردني من البيت عشان شافني بكلم واحد ويعلم ربنا أنه كذاب وهو اللي كدا مش أنا، فرفعت عليه دعوى خلع بمحكمة الأسرة ومنتظرة أولى الجلسات.
تابعوا آخر أهل مصر على Google News
