هدى تطلب الخلع: «ببيسجلي وبيغير مني»

«عمري ما كنت أتوقع جوزي يبقى بالأسلوب ده، ويفكر بطريقة الشياطين، من أول ما اتجوزنا وهو عايز كل الناس تشوفني وحشة وأنه كتير عليّ، وبيستفزني عشان يطلع أسوأ ما فيا، وبيسجل ليّ من غير ما أعرف ويقص كلامي عشان اللي يعرفونا ياخدوا عني فكرة سيئة، وده اللي حصل فعلا وكل الناس بقت تبعد عني لحد ما شخص نور بصيرتي وقالي لي إنه بيسمعهم تسجيلات ليا وأنا بغلط فيه وفي أهله»، جاءت هذه الكلمات على لسان «هدى»، داخل محكمة الأسرة لرفع دعوى خلع من زوجها مبررة ذلك باستحالة العشرة معه.

عايشة في جحيم مش حياة مستقرة

وقالت الزوجة في مستهل حديثها مع 'أهل مصر': 'أتجوزت من سنة واحدة ومن أول الجواز وأنا حاسة أني عايشة في جحيم مش حياة مستقرة، مغرور وشايف نفسه كتير عليا، بيضايق لو حد من أهله أو أصحابنا شكر فيا، أو حد قاله جملة مراتك كتير عليك، وبحسه بيغير لدرجة أنه بيتعمد يقلل من شأني قدام أي حد يشوفه أو حد يزورنا لدرجة أني كنت بتهرب من أي مكان فيه تجمعات عائلية لكن مكنتش أتخيل أنه ممكن يكون بالشكل دا ويشوه صورتي وأخلاقي قدام الناس من ورايا'.

اكتشفت أنه كان بيسجل لي

وتابعت هدى: 'بعد سنة من جوازنا أكتشفت أنه كان بيسجل كل الخناقات بيننا وبيقطع كلامه ويخلي كلامي فقط، ويسمعه لأي حد نعرفه، وكمان أنا فاكرة أنه كان بيستفزني جدا عشان يخرج أسوأ ما فيا ويثبت للناس أني مش كويسة وأخلاقي سيئة وبغلط فيه، وعرفت كل اللي بيعمله من حد قريبي، عشان كده قررت أرفع دعوى الخلع ومازالت الدعوى منظورة أمام القضاء'.