"استحملت معاه الفقر والضغوطات وعمري ماشتكيت، بس مقدرتش استحمل لما عرفت انه عايز يتجوز بنت صغيرة زميلة بنتنا في الدراسة، وقالي انها موافقة تتجوزه، ساعتها مقدرتش استحمل وطلبت منه الطلاق وهو رفض، فقررت أرفع عليه دعوى خلع في محكمة الأسرة"، هكذا بدأت عزة حديثها من داخل محكمة الأسرة بعد أن رفعت دعوى خلع على زوجها بعد عشرة دامت بينهما لأكثر من 20 عامًا.
خلع بعد ٢٠ سنة من الزواج
قالت الزوجة: "تزوجت من عشرون سنة وكان زواج تقليدي، كان مجرد عامل بسيط ووقفت جنبه واتحملت معاه الحلوة والمرة وكنت دايما جنبه، متحملة كل الضغوطات والفقر اللي عيشنا فيه، وربنا رزقنا بـ4 أولاد الكبيرة فيهم بنت، والحياة كانت ماشية طبيعي وكنت بتحمل واربي العيال، واقول هو شقيان عشان مستقبل ولادنا، ولما البنت كبيرة وصلت دخلت الجامعة، حالتنا اتيسرت وهو بدأ يشتغل في العقارات ويكبر شغله، حسيت ساعتها بفرحة وحمدت ربنا وقولت هنرتاح من التعب اللي عشناه 20 سنة، بس هو فاجئني انه عايز يتجوز عليا ويجيبلي ضرة ويدخل واحدة غربة على ولادي".
زميلة بنته فى المعهد
وتابعت حديثها لـ"أهل مصر": "والصدمة الكبيرة بالنسبالي كانت لما عرفت اللي هو عايز يتجوزها، انا كان ممكن اتحمل انه يتجوز واحدة من سنة، بس مقدرتش اتحمل لما عرفت انه عايز يتجوز بنت صغيرة زميلة بنتنا في الدراسة، وقالي انها موافقة تتجوزه، ساعتها مقدرتش استحمل وطلبت منه الطلاق وهو رفض، فقررت ارفع عليه دعو خلع في محكمة الأسرة وهي دلوقتي في في النيابة ومستنية أول جلسة".
تابعوا آخر أهل مصر على Google News
