تقدمت ريم صاحبة الـ 24 عاما بدعوى قضائية داخل محكمة الأسرة لرفع دعوى خلع من زوجها بعد 5 سنوات من الزواج مبررة ذلك بقولها: 'لسانه مش كويس، طول الوقت بيقول ألفاظ مش كويسة ومخجلة، وكنت بقوله ديما انى مش بحب طريقته دى فى الكلام أو الشتيمة بألفاظ قبيحة حتى لو هزار، لكن مافيش فايدة لحد ما خلفت وكان عندى أمل يبطل طريقته دى، لكن للأسف زاد من ألفاظه وطريقته غير المحترمة قدام الولد، وكلمت أهله ومفيش فايدة، لحد ما بقيت أحس ان تربية ابنه معاه خطر وهيضيعه، وقررت اننا ننفصل بهدوء، لكن هو أضطرنى للمحكمة'.
وروت الزوجة قصتها لـ'أهل مصر' قائلة: اتجوزت من 5 سنين زواج صالونات، بعد وفاة والدى شافنى عن طريق الأهل، وحسيت بقبول أول ما شافته، لكن بعد الخطوبة بقيت مترددة أكمل الزواج منه ولا أرفض، ودا كان بسبب جرأته الزيادة معايا فى الكلام، ولما اتكلمت مع صاحباتى فهمونى انها فترة وتعدى وبمجرد الجواز هيبطل وهتلاقيه بيتكلم بطريقة محترمة، وللأسف صدقت كلامهم لأنى معنديش خبرة كبيرة فى حياتى، لكن بعد ما اتجوزنا لقيته أتجرأ أكتر وبقى يقول ألفاظ قبيحة جدا، أحيانا جد وأحيانا بيعتبرها على سبيل الهزار.
وتابعت حديثها: كنت طول الوقت بتجنب الكلام معاه كتير لأنى بصراحة بقيت أشمئز من طريقته، على الرغم انه مش بخيل وكل طلباتى اللى بحتاجها فى البيت بيشتريها على طول، إلا أن طريقته وأسلوبه قدام أى حد يكسف، وفرحت جدا لما ربنا كرمنى بطفل، وقولت انه هيبطل طريقته دى عشان يبقى أب مثالى، لكن للأسف زاد من طريقته دى لحد ما الواد بدأ يلقط منه ويتكلم ويردد كلام زيه، وهنا قررت انى أنفصل عشان أعرف أربي ابنى كويس، وطلبت منه الطلاق فى هدوء لكن هو رفض.
وأكملت: حاولت معاه كتير يا يبطل طريقته فى الألفاظ دى يا يطلقنى، لكن رفض الاتنين وتغير معايا لدرجة انه بقي يشتمنى قدام أهلى بألفاظ قذرة، وأنا الحمدلله عيلة محترمة ومتربية كويس، عشان كدا رفعت عليه دعوى خلع ومازالت الدعوى منظورة قدام القضاء.
تابعوا آخر أهل مصر على Google News
